Ким Чен Ин Россияни Украинага қарши урушда қўллаб-қувватлашда давом этишини таъкидлади

Шимолий Корея раҳбари Ким Чен Ин Россиянинг Украинадаги урушини "шартсиз қўллаб-қувватлашини" билдирди — бу ҳақда Пхеньян давлат оммавий ахборот воситалари хабар берди.

Ким Чен Ин Шимолий Кореяга ташриф буюрган Россия ташқи ишлар вазири Сергей Лавров билан учрашувда, Пхеньян "Украина инқирозининг илдиз сабабларини бартараф этишда Россия раҳбарияти томонидан кўрилган барча чораларни қўллаб-қувватлашини" таъкидлади.

Ғарб расмийларининг фикрича, Шимолий Корея ўтган бир йил ичида тахминан 11 минг нафар аскарни Россияга юборган, улар Украинага қарши урушда иштирок этмоқда.

Шимолий Кореянинг KCNA давлат ахборот агентлигига кўра, Ким ва Лавров шанба куни “дўстона ва ишончли муҳитда” учрашган. Ким Чен Ин Россия армияси ва халқининг “мамлакатнинг қадр-қиммати ва асосий манфаатларини ҳимоя қилишдек муқаддас ишда” албатта ғалаба қозонишига қатъий ишонч билдирганини айтди.

Россия Ташқи ишлар вазирлиги Telegram орқали Ким ва Лавровнинг қўл сиқишиб, бир-бирини бағрига босган видеосини эълон қилди.

ТАСС агентлигининг хабар беришича, Лавров ўзининг шимолий кореялик ҳамкасби Чхве Сон Хуи билан ҳам учрашган ва Россияни қўллаб-қувватлаш учун юборилган “қаҳрамон Шимолий Корея аскарлари”га миннатдорлик билдирган.

Шимолий Кореянинг Россияга ҳарбий ёрдамини тиклаши, АҚШ президенти Дональд Трамп Украинага ҳарбий ёрдамни қайта бошлаган бир пайтда содир бўлмоқда.

Трамп NBC News'га берган интервьюсида, НАТО орқали Украинага Patriot ҳаво мудофаа тизимларини етказиб бериш бўйича келишувга эришганини маълум қилди. Бу қарор Россия ҳаво ҳужумларининг кучайиши ортидан қабул қилинган.

Пхеньян биринчи марта расман 2025 йил апрель ойида ўз аскарларини Россияга юборганини эълон қилган. Бу хабар Украина ва Ғарб давлатлари томонидан йирик миқёсдаги ҳарбий кучлар ҳаракати фош этилгандан кейин пайдо бўлган.

Ким Чен Ин ва Россия президенти Владимир Путин ўтган йил июнь ойида келишув имзолаган эдилар, унга кўра агар икки давлатдан бири “агрессияга учраса”, иккинчиси уни қўллаб-қувватлаши шарт.