КХДР Корея Республикасини ўзининг доимий асосий душмани деб билади ва ўз хавфсизлигини талаб қиладиган фавқулодда вазиятлар юзага келганда унинг ҳудудини босиб олишга тайёр.
Бу ҳақда Шимолий Корея етакчиси Ким Чен Ин Корея халқ армияси ташкил этилганининг 76 йиллиги муносабати билан қилган баёнотида маълум қилди.
"Яқинда партиямиз ва ҳукуматимиз халқимизнинг бўлиниши ва қарама-қаршилиги тарихини сарҳисоб қилиб, жанубий кореялик қўғирчоқларни мамлакатимизнинг энг зарарли ва ўзгармас асосий душмани сифатида аниқлаб, уруш содир бўлган тақдирда уларнинг ҳудудини эгаллаб олишга қарор қилди. Фавқулодда вазият миллий сиёсат сифатида мамлакатимизнинг абадий хавфсизлиги, келажакда тинчлик ва барқарорликни таъминлаш учун оқилона чорадир", - дея Ким Чен Иннинг сўзларидан иқтибос келтиради Корея марказий ахборот агентлиги.
