Кениядаги қизлар мактабида юз берган ёнғин оқибатида 16 нафар ўқувчи ҳалок бўлди

Кения марказидаги қизлар мактабларидан бирида юз берган ёнғин 16 нафар ўқувчининг ҳаётига зомин бўлди. Бу ҳақда BBC News Africa хабар бермоқда.

Нашр маълумотларига кўра, камида 74 киши турли даражадаги тан жароҳатлари билан касалхонага ётқизилган. Кения Қизил Хоч жамиятининг билдиришича, ёнғин ҳақидаги хабар 28 май куни маҳаллий вақт билан соат 03:30 да келиб тушган. Ёнғиннинг келиб чиқиш сабаблари ҳозирча аниқланмаган.

Associated Press агентлигининг қайд этишича, Кениядаги мактаб-интернатларда ёнғинлар мунтазам равишда юз бериб туради. Уларнинг баъзилари қасддан ўт қўйиш, бошқалари эса электр симларидаги носозликлар туфайли содир бўлади.

Маълумот учун: Кениянинг янги тарихидаги энг даҳшатли мактаб ёнғини 2001 йилда содир бўлган бўлиб, ўшанда Мачакос округидаги ётоқхонада юз берган офат оқибатида 67 нафар ўқувчи ҳалок бўлган эди. 2024 йилда ҳам Кения марказидаги мактабда содир бўлган ёнғин 21 нафар ўқувчининг умрига зомин бўлганди.