Канада бош вазири: "Энди АҚШнинг йўл-йўриғига эргашамиз"

Канада Бош вазири Марк Карни мамлакатнинг Америка товарларига нисбатан кўплаб жавоб тарифларини бекор қилиш ниятини тасдиқлади.

Сиёсатчининг айтишича, Канада янги савдо ва хавфсизлик муносабатларини ўрнатиш учун АҚШ билан алоқаларни кучайтирмоқда.

Америка автомобиллари, пўлат ва алюминий учун Канада тарифлари ҳозирча ўз кучида қолади, деди у Оттавадаги матбуот анжуманида.

Карнининг таъкидлашича, Қўшма Штатлар яқинда Канада товарларига бож қўймаслигини очиқ айтган.

"Шу нуқтаи назардан ва Канаданинг USMCA (Америка Қўшма Штатлари-Канада-Мексика Эркин савдо битими) бўйича мажбуриятларига мувофиқ, мен бугун эълон қиламанки, Канада ҳукумати энди Қўшма Штатларнинг йўл-йўриғига эргашади ва Америка товарларига Канада тарифларини бекор қилади" - деди у.

"Канада ва Қўшма Штатлар энди бизнинг товарларимизнинг катта қисми учун эркин савдони тикладилар", дея қўшимча қилди у.