Жиззахда "участковой" аёлга куч ишлатгани айтилган ҳолатга расмий изоҳ берилди

Ижтимоий тармоқларда Фориш туманида юзага келган жанжал ҳамда ички ишлар органлари ходимларининг ҳаракатлари билан боғлиқ хабарлар тарқалди.

Ҳолат юзасидан расмий муносабат билдирилди.

Маълум қилинишича, 5 август куни соат 21:30 ларда Фориш тумани «Оқтепа» МФЙдаги ресторан ишчилари маст ҳолдаги бир гуруҳ шахслар буюртма қилинган таомлар учун ҳақ тўламасдан, тартиббузарлик содир этаётгани ва жанжаллашаётгани ҳақида ИИБга хабар берган.

Чақирув асосида воқеа жойига профилактика инспекторлари ва Қўриқлаш бўлими ходимлари етиб борган. Улар томонидан жамоат тартибини сақлаш чоралари кўрилган.

Бироқ тартиббузарлардан бири — муқаддам судланган аёл — ходимларнинг қонуний талабларига бўйсунмай, жанжални давом эттирган. Шу сабабли у белгиланган тартибда тиббий кўрикдан ўтказилиб, мастлик ҳолатида бўлган шахсларни вақтинча сақлаш ва реабилитация қилиш пунктига («Хушёрхона») жойлаштирилган.

Расмий муносабатда қайд этилишича, тиббий кўрик давомида ушбу фуқаронинг танасида ҳеч қандай тан жароҳати аниқланмаган.

Кейинчалик унинг қизлари «Хушёрхона»га келиб, жамоат тартибини бузган ҳолда ходимларни ҳақорат қилган ва уларга тан жароҳати етказишга уринган.

Юзага келган вазият ходимлар томонидан қонунчиликда белгиланган тартибда бартараф этилган. Бунда фуқароларга нисбатан қўл кишани, резина таёқ ёки электрошокер каби махсус воситалар қўлланилмаган.

Айни пайтда ҳолатда иштирок этган барча шахсларнинг хатти-ҳаракатларига ҳуқуқий баҳо бериш мақсадида терговга қадар текширув ҳаракатлари олиб борилмоқда.