Жанубий Кореядан жиддий қадам: жанубликлар ҳам Россия-Украина урушига аралашмоқчи

Сеул Киевга қурол юбориш имкониятини кўриб чиқмоқда.

Жанубий Корея президенти Юн Сок Ёл Сеул Шимолий Кореянинг Украинадаги урушда Россияга қўшин киритган бўлиши мумкинлиги ҳақидаги хабарлар юзасидан индамай ўтирмаслиги ҳақида огоҳлантирди.

Чоршанба куни АҚШ миллий хавфсизлик бўйича маслаҳатчиси Жон Кирби Оқ уйдаги матбуот брифингида камида 3000 Шимолий Корея аскари октябрь ойининг боши ва ўрталари орасида Россия шарқига жўнатилганини айтди.

«Биз бу аскарлар Россия ҳарбийлари билан бирга жангга киришадими ёки йўқми, билмаймиз, аммо бу, албатта, катта эҳтимоллик», деди Кирби.

Жанубий Корея дунёдаги энг йирик қурол экспортчиларидан бири, бироқ Сеул узоқ вақтдан бери АҚШ ва бошқаларнинг Украинани қурол-яроғ билан таъминлаш ҳақидаги чақириқларига қаршилик қилиб келади.

Бироқ пайшанба куни Сеул Украинани қурол-яроғ билан таъминлашни «кўриб чиқиш»ини айтди. Юн пайшанба куни Жанубий Корея «халқаро ҳамжамият билан ҳамкорликда керакли чораларни кўришини» айтди.

«Биз ҳалокатли қуролларни тўғридан-тўғри етказиб бермаслик тамойилини сақлаб қолган бўлсакда, Шимолий Корея кучларининг ҳаракатларига қараб, буни янада мослашувчан тарзда кўриб чиқишимиз мумкин», деди у пайшанба куни Сеулда Полша президенти Анжей Дуда билан учрашувдан сўнг матбуот анжуманида.

Юн ва Дуда стратегик алоқаларни муҳокама қилиш ва йил охиригача Жанубий Кореянинг К-2 танкларини Полшага экспорт қилиш бўйича янги шартномани якунлаш учун учрашди.

Ҳар икки етакчи Шимолий Корея қўшинларининг Россияга киритилишини қоралаб, бу глобал таҳдид эканлигини таъкидлади.

«Биз Шимолий Кореянинг БМТ низоми ва БМТ Хавфсизлик Кенгаши резолюцияларини тўғридан-тўғри бузувчи Россияга қўшин киритишини глобал хавфсизликка таҳдид солувчи провокация эканлигига келишиб олдик», — деди Юн музокаралардан сўнг.