АҚШ президенти Доналд Трамп, агар Пекин аввалроқ эълон қилинган қарши чоралардан воз кечмаса, Вашингтон 9 апрелдан Хитойга қарши қўшимча 50 фоизлик божлар жорий этишини маълум қилди. Бу ҳақда Reuters хабар бермоқда.
Трамп, шунингдек, ХХР билан тариф сиёсати бўйича музокаралар жараёнини тўхтатиш билан ҳам таҳдид солди.
"Агар Хитой эртага, 2025 йил 8 апрелгача илгари киритилган узоқ муддатли савдо чекловларидан ошиб кетган 34 фоизлик ўсишни бекор қилмаса, Қўшма Штатлар 9 апрелдан бошлаб 50 фоизлик қўшимча божларни жорий этади," деди Америка раҳбари.
"Бундан ташқари, Хитойнинг биз билан учрашиш бўйича барча сўровлари рад этилади!" дея қўшимча қилди Трамп.
U, учрашувлар ўтказишни сўраган бошқа давлатлар билан музокаралар "дарҳол бошланиши"ни таъкидлади.
Шу билан бирга, Доналд Трамп америкаликлар хотиржамликни сақлашлари лозимлигини таъкидлади. "Заиф бўлманг. Аҳмоқлик қилманг. Ваҳимачилар партияси - заиф ва нодон одамларга асосланган янги партия сафига қўшилманг," дея ёзди Трамп Truth Social ижтимоий тармоғида. "Кучли, жасур ва сабрли бўлинг. Натижада буюкликка эришасиз," деб таъкидлади Америка раҳбари.
Унинг бу сўзлари ўтган ҳафта АҚШ фонд бозори COVID-19 пандемияси бошланганидан бери энг ёмон кўрсаткичларни қайд этгани, фонд индекслари ўтган йилнинг май ойидан буён энг паст даражага тушгани фонида янгради.
2 апрель куни АҚШ президенти Доналд Трамп 185 мамлакатдан келтирилган маҳсулотларга божлар жорий этилишини эълон қилди, уларнинг айримлари учун алоҳида ставкалар белгиланди. Хитойга нисбатан қўлланиладиган божлар 34 фоизни ташкил этди. Ветнам ва Туркия каби бир қатор давлатлар музокаралар ўтказишга умид қилмоқда, бошқалари эса жавоб чоралари йўлидан бормоқда. Хусусан, Хитой 10 апрелдан бошлаб Америка товарларига импорт божларини 34 фоизгача оширмоқчи.
Эрон олтита давлатни огоҳлантирди
ТЕЗКОР АХБОРОТ: Ўзбекистоннинг баъзи ҳудудларини сув босиши мумкин
Криштиану Роналду ўзининг биринчи футбол клубини сотиб олмоқчи
