Жаҳон чемпионатини бойкот қилиш борасида Германиянинг аниқ позицияси маълум бўлди

Германия футбол иттифоқи (DFB) ҳозирча футбол бўйича 2026 йилги Жаҳон чемпионатини бойкот қилиш масаласини кўриб чиқмаётганини маълум қилди. Бу ҳақда ташкилот расмий сайтида эълон қилинган баёнотда айтилади.

Аввалроқ Германия Бундестагидаги Христиан-демократик ва Христиан-социал иттифоқлар (ХДИ/ХСИ) фраксиясининг ташқи сиёсат бўйича вакили Юрген Хардт АҚШ президенти Дональд Трампнинг Гренландия бўйича баёнотлари фонида Жаҳон чемпионатини бойкот қилиш эҳтимолини сўнгги чора сифатида тилга олганди. Шунингдек, “Санкт-Паули” клуби президенти ва DFB ижроия қўмитаси аъзоси Оке Геттлиҳ Hamburger Morgenpost нашрига берган интервьюсида барчани бойкот масаласини муҳокама қилишга чақирган эди.

DFB баёнотида таъкидланишича, ташкилот ижроия қўмитаси спорт сиёсатига оид масалалар жамоатчилик олдида эмас, балки ички доирада муҳокама қилиниши керак. Қайд этилишича, АҚШ, Канада ва Мексикада бўлиб ўтадиган 2026 йилги Жаҳон чемпионатини бойкот қилиш масаласи ҳозирда кун тартибида эмас.

“Биз спортнинг бирлаштирувчи кучига ва футбол бўйича Жаҳон чемпионатининг глобал миқёсдаги ижобий таъсирига ишонамиз. Бизнинг мақсадимиз ушбу ижобий кучни кучайтириш, унга тўсқинлик қилиш эмас”, дейилади баёнотда.

Роя News нашри хабарига кўра, АҚШ сиёсатига норозилик сифатида Жаҳон чемпионатини бойкот қилиш чақириқлари фонида бир кеча давомида қарийб 17 минг нафар мухлис турнир учун харид қилинган чипталарни бекор қилган. Франциялик депутат Эрик Кокрел эса X (собиқ Twitter) тармоғидаги саҳифасида мусобақани фақат Канада ва Мексика ҳудудида ўтказишни таклиф қилиб, АҚШни қўшни давлатларга босим ўтказишда, Гренландияга бостириб кириш билан таҳдид қилишда ҳамда халқаро ҳуқуқни бузишда айблаган.

Маълумот учун, 2026 йилги Жаҳон чемпионати илк бор 48 та миллий терма жамоа иштирокида ўтказилади ва у бир вақтнинг ўзида уч давлат — АҚШ, Канада ва Мексика ҳудудида бўлиб ўтади. Мусобақа 11 июндан 19 июлгача давом этади.