Италия мактабларида бурқа ва ниқоб тақиқланади, синфларда чет эллик ўқувчилар сонига чеклов киритилади

Жоржа Мелони тегишли режани ўзининг “Италия биродарлари” партиясининг ёшлар қаноти йиғилишида эълон қилди. У “мактаб тизимига интеграция қилишда жиддий қийинчиликларга дуч келаётган” чет эллик ўқувчиларнинг ота-оналари учун италян тили дарслари мажбурий қилинишини айтди.

"Биз учун Италияга келган ва бу ерда ўз келажагини қурмоқчи бўлган ҳар бир киши тилимизни ўрганиши, маданиятимизни тушуниши ва қоидаларимизни ҳурмат қилиши керак", — деди Италия ҳукумати раҳбари.

Шунингдек, Мелони ҳар бир синфдаги хорижлик ўқувчилар сонига қонуний чеклов жорий этишини ҳам айтди. Бироқ Италия қонунчилигида ҳар бир синф ва мактабдаги хорижлик ўқувчилар улуши учун аллақачон 30 фоизлик чеклов мавжуд. Мелони ушбу тартиб қандай ўзгаришини аниқ тушунтирмади. Ҳозирда Италия мактабларидаги ўқувчиларнинг қарийб 12 фоизини хорижликлар ташкил этади.