Исроил тажовузи оқибатида кўп сонли тинч аҳоли ҳалок бўлди – Пезешкиён

Исроилнинг Эрон Ислом Республикасига берган зарбалари натижасида кўп сонли тинч аҳоли қурбон бўлди ва яраланди, деди Эрон президенти Масъуд Пезешкиён, IV Евроосиё иқтисодий форумида сўзлаган онлайн нутқида.

"Исроил режими уюштирган ҳужумлар давомида ҳарбий хизматчиларга, уларнинг хизмат манзилларидан ташқарида, университет профессорлари ва оддий фуқароларга қарши қатор ноқонуний ва жиноий ҳужумлар уюштирилди. Аҳоли турар жойлари, жамоат инфратузилмаси, касалхоналар ва тиббиёт марказларига қилинган ҳужумлар натижасида кўп сонли тинч аҳоли ҳалок бўлди ва яраланди", — деди Пезешкиён.

Унинг сўзларига кўра, 12 кунлик уруш давомида Эрон Қуролли кучлари БМТ Низомининг 51-моддасига асосланиб, Эроннинг олижаноб миллати, миллий суверенитети ва ҳудудий яхлитлигини қонуний ҳимоя қилган.

Унинг сўзларига кўра, Эроннинг Исроил агрессиясига муносабати Яқин Шарқ давлатларини янада йирикроқ можародан қутқариб қолди. “Агар сионистик режимнинг тажовузи жавобсиз қолса, бу минтақада кенг кўламли ва назорат қилиб бўлмайдиган урушга олиб келиши мумкин эди”, - дейди Пезешкиён.

25 июнь куни Эрон Соғлиқни сақлаш вазирлиги Исроилнинг 13 июндан бери уюштирган зарбалари натижасида мамлакатнинг камида 627 нафар фуқароси ҳалок бўлгани ва 4870 нафардан ортиқ киши жароҳат олганини маълум қилган эди.