Исроил АҚШнинг Ғазода ўт очишни тўхтатиш таклифини қабул қилди, лекин яҳудийлар ҳужум қилишда давом этмоқда...

Исроил Вашингтоннинг Ғазо секторида ўт очишни тўхтатиш таклифини қабул қилди.

Бу ҳақда яҳудий давлатининг БМТдаги доимий вакили Данни Данон маълум қилди.

"Исроил Трампнинг ўт очишни тўхтатиш бўйича таклифига рози бўлди. Биз жанговар ҳаракатларни тўхтатишга тайёрмиз, бироқ ХАМАС рад этмоқда", - деди у Исроилнинг Доҳага берган зарбаси муносабати билан чақирилган БМТ Хавфсизлик кенгаши йиғилишида.

Исроил бош вазири Беньямин Нетаньяху аввалроқ Ғазо сектори аҳолисини ХАМАС бошқарувидан қутулишга ва президент Трамп илгари сурган тинчлик таклифига рози бўлишга чақирган эди.

7 сентябрь куни Трамп ХАМАСдан Ғазо секторидаги можарони тартибга солиш бўйича унинг шартларини қабул қилишни талаб қилганини ва бу “охирги огоҳлантириш” эканлигини таъкидлади. Саудия Арабистонининг Al Hadath телеканали хабарига кўра, Трамп бўлажак ўт очишни тўхтатиш келишуви кучга киргандан сўнг 48 соат ичида ХАМАСдан барча гаровдагиларни озод қилиш ва ҳалок бўлган асирларнинг жасадларини Исроилга топширишни талаб қилган. АҚШ президентининг таклифида сектордаги жанговар ҳаракатларни якуний тугатиш бўйича музокаралар 60 кун давом этадиган ва узайтирилиши мумкин бўлган сулҳдан сўнг дарҳол бошланишига доир “шахсий кафолатлар” ҳам бор.

9 сентябрь куни Доҳада қатор портлашлар содир бўлди. Кўп ўтмай Исроил армияси матбуот хизмати ҳарбийлар Бош хавфсизлик хизмати кўмагида ва ҳаво кучлари иштирокида ХАМАС вакилларига зарбалар берганини маълум қилди.