Ислом Каримов иштирокидаги видеони тарқатгани учун қамалган қизнинг ҳукми ўзгармади

Аввалроқ, Тошкент вилоятининг Юқори Чирчиқ тумани Чирчиқ маҳалласи Шодон кўчасида яшовчи фуқаро С.Ш. Ўзбекистоннинг Биринчи Президенти Ислом Каримов ва Ўзбекистон Исломий Ҳаракати террорчилик ташкилоти раҳбари Тоҳир Йўлдош ўртасидаги суҳбат акс этган видеони отасига улашгани учун Жиноят кодексининг 159-моддаси (Конституциявий тузумга тажовуз қилиш) билан айбланаётгани ҳақида хабар берилганди. Суд уни шартли равишда 2,5 йилга озодликдан маҳрум қилган. Бугун, 21 август куни жиноят ишлари бўйича Тошкент вилояти судининг аппеляция судлов ҳайъати ҳам қуйи инстанция суди томонидан чиқарилган С.Ш.га нисбатан ҳукмни кучда қолдирди. Бу ҳақда Qalampir.uz “Эзгулик” инсон ҳуқуқлари жамияти раиси Абдураҳмон Ташановга таяниб, маълум қилди.

Жиноят иши материалларига кўра, фуқаро С.Ш.га 2023 йилнинг сентябрь ойида отасининг телефон аппаратига 1991 йилда Наманганда Биринчи Президент Ислом Каримовнинг маҳаллий ҳокимият биносини босиб олган экстремистлар раҳбари Тоҳир Йўлдош билан тарихий мулоқоти акс этган ҳаволани юборган. Видео бундан 10 йил аввал YouTube платформасига жойланган бўлиб, ҳозиргача омма эътиборида. Уни деярли етти миллион киши томоша қилишга ҳам улгурган. Судда “Легендарная съемка. Тахир Юлдаш и Ислам Каримов в Намангане в 1991 году” деб аталувчи мазкур видео конституциявий тузумни ағдаришга қаратилган жиноят сифатида эътироф этилган.

“Судга оид диншунослик экспертизасига кўра, мазкур контент экстремистик, тақиқланган ва конституциявий тузумга тажовуз қилишни ифодаловчи материал, деб топилган. Ҳолбуки, мазкур видеоконтент Ўзбекистон Миллий телерадиокомпанияси каналлари орқали оммага тўлиқ намойиш этилган. Бу ҳақдаги барча маълумотларни судга тақдим этдик. Демак, С.Ш.ни айблаган суд Ўзбекистон МТРКга нисбатан ҳам хусусий ажрим чиқариб, компанияни жиноий таъқиб доирасига киритиши керак эди. Аксинча, қонун устувор юртимизда ҳуқуқий ёндашув масаласи икки хил стандартга асосланган бўлиб қолади”, дея ёзган Ташанов.

Шунингдек, Абдураҳмон Ташанов Бош прокуратурани судга оид диншунослик экспертизаси билан экстремистик, тақиқланган ва конституциявий тузумга тажовуз қилишни ифодаловчи материални тарқатганлиги учун Ўзбекистон МТРК таркибига кирувчи бир неча телеканалларни конституциявий тузумга тажовуз қилганликда айблашга, аксинча, С.Ш.нинг иши юзасидан юқори судларга протест киритишга чақирган.

Маълумот учун, судга оид диншунослик экспертизасининг 2023 йил 17 октябрдаги экспертизаси хулосасига кўра, ушбу видео экстремистик ва конституциявий тузумга тажовуз қилишни ифодаловчи материаллар қаторига киритилган.