Иш ташлаш ҳуқуқи қонун билан мустаҳкамланади

Қонунчилик палатаси депутатлари 9 сентябр куни Сенатнинг «Фуқароларнинг меҳнат ҳуқуқлари кафолатлари кучайтирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги қонунчилик таклифини кўриб чиқди.

Қайд қилинишича, ушбу лойиҳа иш ташлаш ҳуқуқини қонуний тартибга солишни назарда тутади ва миллий қонунчиликда бўшлиқни тўлдириш орқали фуқароларнинг меҳнат ҳуқуқларини халқаро стандартларга мувофиқ ҳолда тўлақонли таъминлашга хизмат қилади.

Таъкидланишича, қонун лойиҳасининг мақсади — миллий қонунчиликни Халқаро меҳнат ташкилоти (ХМТ) «Бирлашмалар эркинлиги ва бирлашиш ҳуқуқини ҳимоя қилиш тўғрисида»ги ва «Жамоа музокараларини олиб бориш ва бирлашиш ҳуқуқи тўғрисида»ги конвенциялари талабларига мувофиқлаштиришдан иборат. Бу, ўз навбатида, Иқтисодий, ижтимоий ва маданий ҳуқуқлар тўғрисидаги халқаро пактда белгиланган меъёрларни амалда рўёбга чиқаришга хизмат қилади.

Қонун лойиҳаси 9 та моддадан иборат бўлиб, у билан 2 та қонун, 4 та кодексга қатор муҳим ўзгартириш ва қўшимчалар киритилмоқда. Жумладан, Меҳнат кодексига иш ташлашнинг аниқ таърифи ва тушунчалари, уни ўтказиш тартиб-таомиллари, ходимларга иш ташлаш жараёнида бериладиган кафолатлар белгиланмоқда.

Шунингдек, иш ташлашнинг бошланишини кечиктириш, тўхтатиб туриш, тиклаш ва тугатиш тартиблари ҳамда иш ташлашга оид чекловлар аниқлаштирилмоқда.

Қонун лойиҳаси миллий қонунчиликни халқаро меҳнат стандартларига тўлиқ мослаштириш, ижтимоий адолат, тенглик ва демократик бошқарув принципларини амалда мустаҳкамлашни назарда тутади.

Мажлисда қонунчилик таклифи бўйича қарор лойиҳаси қабул қилинди.