Индонезияда 243 киши бўлган паром чўкди: 140 киши бедарак йўқолган

Йўловчи ташувчи Virgo Transport 8 пароми Индонезия соҳиллари яқинида, Ява денгизида чўкиб кетди. Кема бортида 243 киши — 213 нафар йўловчи ва 30 нафар экипаж аъзоси бўлган.

Кема Ява оролидаги Сурабаядан Борнео оролидаги Банджармасинга йўл олган ва кучли бўронга дуч келган.

Якшанба куни эрталаб экипаж кема билан алоқани йўқотган. Унга қадар паром тахминан 500 километрлик йўналишнинг учдан икки қисмини босиб ўтган эди.

Ҳукумат маълумотларига кўра, қутқарувчилар сувдан 103 кишини топиб, қутқарган. Бир киши ҳалок бўлган, яна тахминан 140 киши бедарак йўқолган деб ҳисобланмоқда.

Қутқарув операцияси давом этмоқда. Тирик қолганларни Ява оролининг шарқидаги портга олиб бориш режалаштирилган. Қутқарувчилар эса бедарак йўқолганларни излашда давом этмоқда. Паром ёмон об-ҳаво шароитида чўкиб кетган.

Virgo Transport 8 — узунлиги 119 метр, 39 йиллик кема бўлган.

Индонезия учун паром қатнови жуда муҳим аҳамиятга эга. Мамлакат таркибида 17 мингдан ортиқ орол мавжуд бўлиб, улар ўртасида йўловчи ва юк ташишда паромлар кенг қўлланилади.