Ҳормуз очилиши етарли эмас: АҚШ Эрондан ядровий чекловлар ҳам талаб қилмоқда

АҚШ Давлат котиби Марко Рубионинг маълум қилишича, Вашингтон Эронга қарши санкцияларни фақат Ҳормуз бўғозини очгани учун бекор қилиш ниятида эмас.

Унинг сўзларига кўра, Теҳрон аввало Ҳормуз бўғозидаги блокадани тугатиши, тижорат кемаларидан мажбурий тўлов йиғишни ва уларга қарши ҳужумларни тўхтатиши, шунингдек, денгиз миналарини олиб ташлаши лозим.

Рубио буни музокараларнинг кейинги босқичига ўтиш учун зарур шарт деб атади.

Шундан кейин Эроннинг юқори даражада бойитилган урани тақдири, уран бойитиш фаолиятини чеклаш ёки тақиқлаш ҳамда ядровий дастурга узоқ муддатли назорат ўрнатиш бўйича музокаралар бошланиши мумкин.

АҚШ Давлат котиби бу жараён техник жиҳатдан жуда мураккаб эканини таъкидлаб, музокараларнинг иккинчи босқичи 30 кундан 90 кунгача давом этиши мумкинлигини билдирди.

Шу билан бирга, АҚШ Эронга иқтисодий босимни кучайтиришда давом этмоқда. 3 июнь куни Вашингтон Эроннинг йирик криптовалюта платформаларига қарши янги санкциялар жорий қилди.

Скотт Бессентнинг таъкидлашича, Эрон рақамли активлардан санкцияларни четлаб ўтиш ва капитални мамлакатдан олиб чиқиш учун фойдаланмоқда.