Ҳиндистон Россия ва Эронга қарши санкцияларни кучайтириш тўғрисидаги қонун лойиҳаси АҚШ Конгресси томонидан маъқулланганидан сўнг ўзининг савдо ва иқтисодий манфаатларини ҳимоя қилиш учун зарур чораларни кўришини маълум қилди. Бу ҳақда Ҳиндистон Ташқи ишлар вазирлиги хабар берди.

Вазирлик таъкидлашича, Ҳиндистон 1,4 миллиард аҳолининг энергетик хавфсизлигини таъминлашда давом этади. Бунда энергия таъминотини диверсификация қилиш ва жаҳон бозоридаги вазият ҳисобга олинади.

Янги чекловларнинг эҳтимолий оқибатлари сўнгги ойларда Нью-Деҳли ва Вашингтон ўртасида юқори даражада муҳокама қилинган.

17 сентябрь куни АҚШ Вакиллар палатаси Россия ва Эронга қарши санкцияларни кучайтиришни назарда тутувчи Lindsey O. Graham Sanctioning Russia and Iran Act of 2026 қонун лойиҳасини 262 овоз билан 159 овозга қарши маъқуллади. Ҳужжат аввалроқ Сенат томонидан ҳам қабул қилинган ва энди имзолаш учун президент Дональд Трампга юборилган.

Қонун лойиҳасини июль ойида вафот этган республикачи сенатор Линдси Грэм илгари сурган эди.

Ҳужжат Россия энергетика ресурсларининг йирик харидорларига нисбатан иккиламчи савдо чекловларини жорий этиш имконини беради. Хусусан, Россия нефти ёки газини харид қиладиган мамлакатлардан импорт қилинадиган товарларга 100 фоизгача бож жорий этилиши мумкин.

Ҳиндистон эса Россия нефтининг энг йирик харидорларидан бири бўлиб қолмоқда.