Ҳавонинг ифлосланиши жисмоний машқлар самарасини камайтиради

Ҳаводаги заҳарли моддаларнинг узоқ муддатли таъсири мунтазам жисмоний машқларнинг ҳимоя самарасини икки баравар камайтириши мумкин.

Бундай хулосага халқаро олимлар гуруҳи, жумладан, Лондон университети коллежи тадқиқотчилари ҳам келди. Тадқиқот BMC Medicine журналида чоп этилди.

Тадқиқот Буюк Британия, Тайван, Хитой, Дания ва АҚШдан 1,5 миллиондан ортиқ катта ёшли инсонни қамраб олди. Иштирокчилар ўн йилдан ортиқ вақт давомида кузатилиб, уларнинг жисмоний фаоллик даражаси ва атрофдаги ҳаво сифати баҳоланди.

PM2,5 майда дисперсли заррачаларининг концентрациясига алоҳида эътибор қаратилди. Бу майда ифлослантирувчи моддалар ўпкага чуқур кириб, сўнгра қон оқимига ўтишга қодир.

Таҳлиллар шуни кўрсатдики, ҳафтасига камида икки ярим соат шуғулланганларда мунтазам жисмоний машқлар барча сабаблардан ўлим хавфини тахминан 30 фоизга камайтирган. Бироқ, агар одамлар ҳаво ифлосланиши даражаси юқори бўлган ҳудудларда яшаса, бу самара сезиларли даражада пасайган.

PM2,5 нинг ўртача йиллик концентрацияси 25 мкг/м³ дан юқори бўлганда, ҳимоя самараси қарийб икки баравар — 12-15 фоизгача камайган.

Янада оғирроқ шароитларда — ифлосланиш даражаси 35 мкг/м³ дан ошганда — машғулотларнинг фойдаси, айниқса, саратон касаллигидан ўлим хавфини камайтириш борасида янада пасайган. Олимларнинг сўзларига кўра, жаҳон аҳолисининг қарийб учдан бир қисми ҳавонинг бундай ифлосланиш даражаси таъсирига дучор бўлмоқда.

Лондон Университет коллежи профессори Эндрю Стептоунинг сўзларига кўра, заҳарли ҳаво жисмоний машқларнинг саломатликка таъсирини сусайтириши мумкин, аммо уларнинг самарасини бутунлай йўққа чиқармайди.

Олимларнинг таъкидлашича, таҳлилда даромад, таълим даражаси, чекиш ва сурункали касалликларнинг мавжудлиги каби бошқа омиллар ҳам ҳисобга олинган, бу эса хулосаларнинг ишончлилигини оширади.