ҲАМАС Ғазо секторида ўт очишни тўхтатиш бўйича воситачиларнинг таклифини қабул қилди – Reuters

Агентлик бу ҳақда Ғазо сектори томонидан билвосита музокараларда вакиллик қилаётган фаластинлик гуруҳ етакчиси Халил ал-Ҳайянинг сўзларига таяниб хабар берди.

"Икки кун аввал биз Миср ва Қатар воситачиларидан таклиф олдик. Биз унга ижобий муносабат билдирдик ва уни қабул қилдик", – дея агентлик ал-Ҳайянинг маҳаллий телевидениеда берган баёнотидан иқтибос келтиради.

Аввалроқ Reuters манбалари Миср Исроилдан ўт очишни тўхтатиш бўйича янги таклиф юзасидан “ижобий сигналлар” олганини хабар қилган эди. Унга кўра, ҲАМАС ҳар ҳафта беш нафар исроиллик асирни озод қилиши керак.

Исроил расмийлари воситачиларнинг таклифи қабул қилинганми ёки йўқлиги ҳақидаги сўровга жавоб бермаган.

Исроил ва ҲАМАС ўртасида ўт очишни тўхтатиш бўйича уч босқичдан иборат келишувнинг биринчи босқичи 19 январ куни кучга кирганди. Бу 15 ойлик урушдан кейин амалга оширилган эди. Унинг муддати 1 мартда тугади ва иккинчи босқич шартлари бўйича келишувга эришиб бўлмади. 18 март куни Исроил Ғазо секторида бомбардимон ва қуруқлик операцияларини қайта бошлади, ҲАМАС эса Исроилга ҳужумларини давом эттирди.