ҲАМАС: АҚШ режасига мувофиқ барча гаровдаги шахсларни озод қилишга тайёрмиз

ҲАМАС ҳаракати АҚШ томонидан таклиф қилинган Ғазо можаросини тартибга солиш режаси доирасида барча гаровда ушлаб турилганларни озод қилишга розилигини билдирди. Бу ҳақда ҳаракатнинг расмий сайтида эълон қилинган баёнотда маълум қилинди.

📌 Режанинг асосий бандлари қуйидагича:

• Уруш ҳаракатларини тўлиқ тўхтатиш;

• ҲАМАС томонидан асирга олинган барча гаровдагиларни 72 соат ичида озод қилиш;

• Ғазо секторига вақтинчалик ташқи бошқарув жорий қилиш;

• Маҳаллий аҳолига ҳудуддан чиқиб кетиш ёки қайта кириш ҳуқуқини бериш.

Баёнотда ҲАМАС қуйидагиларни таъкидлади:

«Ғазо секторида халқимизга қарши олиб борилаётган тажовуз ва геноцид урушини тўхтатиш, миллий масъулият, принциплар, халқимизнинг ҳуқуқ ва манфаатларини ҳимоя қилиш нуқтаи назаридан, ҲАМАС ҳаракати раҳбарлик тузилмалари, бошқа фаластинлик ҳаракатлар ҳамда воситачилар билан маслаҳатлашувлар ўтказди.»

Натижада ҳаракат қуйидаги позицияни билдирди:

• ҲАМАС АҚШ Президенти Дональд Трамп томонидан илгари сурилган — урушни тўхтатиш, гаровдагилар алмашинуви, инсонпарварлик ёрдамини етказиш ва Ғазо секторидаги босқинни тўхтатишга қаратилган — саъй-ҳаракатларни мамнуният билан қабул қилади;

• Бу доирада, ҲАМАС барча гаровдагиларни — тирик ёки вафот этганларини — озод қилишга розилик билдирди, бунда зарур шарт-шароитлар таъминланиши лозим;

• Ҳаракат воситачилар орқали музокараларни бошлашга тайёр эканини билдирди;

• ҲАМАС Ғазо сектори бошқарувини араб ва исломий давлатлар ёрдамида мустақил мутахассислардан иборат миллий келишув асосида ташкил этиладиган фаластинлик вақтинчалик маъмуриятга топширишга рози бўлди;

• Режанинг бошқа жиҳатлари (Ғазонинг келажаги, фаластинликларнинг ажралмас ҳуқуқлари) эса халқаро ҳуқуқ ва қарорлар асосида кенг қамровли миллий фаластин позицияси доирасида кўриб чиқилиши лозим.