Гиёҳвандлик воситаларининг ноқонуний олиб кирилишига қарши навбатдаги тезкор тадбирлар ўтказилди

“Тошкент-Аэро” ихтисослаштирилган божхона комплекси тезкор тузилмалари томонидан гиёҳвандлик воситаларининг ноқонуний олиб кирилиши ва ички ҳудуддаги яширин айланмасига қарши навбатдаги тезкор тадбирлар ўтказилди.

Пойтахт аэропортида Бишкекдан учиб келган қўшни давлат фуқароси божхонадан “яшил” йўлак орқали ҳаракатланиб, жомадонида синтетик гиёҳвандлик воситаларини олиб киришга урингани фош қилинди. Гўёки спорт озуқаси тарзида олиб ўтилаётган 2 та қутидаги 684 дона капсула таркибида 560,75 гр. “алфа-PVP” синтетик гиёҳвандлик моддаси мавжудлиги аниқланди.

Шундан сўнг мазкур наркожиноятнинг илдизига етиб бориш мақсадида комплекснинг Контрабандага қарши курашиш шўъбаси томонидан давлат хавфсизлик хизмати ва ички ишлар идоралари вакилларини жалб қилган ҳолда Тошкент шаҳрида тезкор тадбир ўтказилди. Яъни хориждан олиб кирилган 560,75 гр. “алфа-PVP” синтетик гиёҳвандлик моддасини қабул қилиб олиши керак бўлган шахс ҳам Бектемир туманида қўлга олинди.

Ушбу шахснинг хонадони белгиланган тартибда кўздан кечирилганида, бу ерда 114 дона капсулада тахминан 80 гр. оғирликдаги “ALFA-PVP” синтетик гиёҳвандлик моддаси ва уларни тарқатиш учун ҳозирланган 37 дона ўрамчалар, 2 гр. оғирликдаги “марихуана”, 2 дона ўрамда 30 гр. оғирликда бошқа турдаги синтетик наркотик модда, 4 дона электрон тарози, изоленталар ва zip пакетлар мавжудлиги аниқланиб, далилий ашё тариқасида олинди.

Шунингдек, “Тошкент-Аэро” ИБК Контрабандага қарши курашиш шўъбаси томонидан Сурхондарё вилояти божхона бошқармаси ва Давлат хавфсизлик хизмати билан ҳамкорликда Сариосиё туманида навбатдаги тезкор тадбир ўтказилди.

Тезкор тадбирда аввалдан кузатувга олинган шахс ёнидаги 14 дона ўрамга жойланган 14 кг 680 гр. оғирликдаги “опий” гиёҳвандлик воситасини 180 минг АҚШ долларига сотayotgan вақтида қўлга олинди.

Ҳозирда ҳар иккала ҳолат юзасидан божхона органлари томонидан жиноят ишлари қўзғатилди.

Эслатиб ўтамиз, республикамиз божхоначилари йил бошидан буён аниқланган 171 та ҳолатда 383 кгдан зиёд гиёҳвандлик воситаларининг божхона чегаралари орқали олиб ўтилиши ва ички ҳудуддаги яширин айланмасига чек қўйишди.