Германияда Туркия фуқаролари иштирокида пичоқли ҳужум юз берди

Германия ғарбидаги Золинген шаҳрида пичоқ билан қилинган ҳужум натижасида бир неча киши жароҳатланди, деб хабар бермоқда Bild нашри.

Полиция буни олдиндан режалаштирилган ҳужум ёки террорчилик ҳаракати деб ҳисобламаяпти. Воқеа йўл-транспорт ҳодисасидан бошланган бўлиб, унинг оқибатида икки эркак ўртасида жанжал келиб чиққан. Учинчи шахс эса уларни тинчлантириш мақсадида можарога аралашган.

Натижада, муштлашув иштирокчиларидан бири танасининг юқори қисмидан кўплаб пичоқ жароҳатларини олган. Қолган икки киши енгил жароҳатланган. Можаро иштирокчилари икки нафар Туркия фуқароси ва бир нафар Германия-Туркия икки томонлама фуқаролигига эга шахс эканлиги маълум бўлди.

Эслатиб ўтамиз, воқеа сабабли шаҳардаги мактаблардан бирида ўтказилаётган антитеррор машғулотлари тўхтатилган ва барча полиция кучлари воқеа жойига йўналтирилган. Ҳозирда тергов ҳаракатлари давом этмоқда.