Трамп Хормуз бўғозини очмасдан ортга чекинадими?

Америка ОАВ хабарларига кўра, Оқ уй ҳозирча бўғозни дарҳол ҳарбий куч билан очишга уринмасликка қарор қилган. Бунинг ўрнига Вашингтон дипломатия ва иттифоқчиларга таянишни режалаштирмоқда.

АҚШ президенти Дональд Трамп ёрдамчиларига, ҳатто Хормуз бўғози катта даражада ёпиқ қолса ҳам, Эронга қарши ҳарбий операцияни тўхтатишга тайёр эканини билдирган. Бу ҳақда Wall Street Journal нашри маъмурият вакилларига таяниб хабар берди.

Уларнинг маълумотига кўра, Трамп ва унинг жамоаси бўғозни зудлик билан куч ишлатиб очиш 4–6 ҳафталик афзал кўрилган муддатдан ташқарига чиқиб кетишини англаган. Шу сабабли маъмурият Эрон флотини ва ракета салоҳиятини заифлаштиришга эътибор қаратмоқчи, шу билан бирга Теҳронга дипломатик босимни кучайтиради.

Агар музокаралар муваффақиятсиз якунланса, Хормузни очиш вазифаси Европа ҳамкорлари ва Форс кўрфази минтақасидаги иттифоқчиларга юклатилиши мумкин. Шунга қарамай, ҳарбий вариантлар ҳамон кўриб чиқилмоқда. Оқ уй матбуот котиби Каролин Левитт АҚШ бўғоз орқали нормал кемалар қатновини тиклаш устида «иш олиб бораётганини» айтди.

Можаро 28 февраль куни Исроил ва АҚШ Эронга қарши операция бошлаганидан бери давом этмоқда. Мавжуд маълумотларга кўра, ҳалок бўлганлар сони 1340 кишидан ошган, улар орасида Эрон олий раҳбари оятуллоҳ Али Хоманаий ҳам бор. Жавобан Теҳрон Исроил, Иордания, Ироқ ва АҚШ ҳарбий объектлари жойлашган Форс кўрфази мамлакатларига дрон ва ракета зарбалари берган.

Эрон ТИВ расмий вакили Исмоил Бағаий душанба куни сўнгги 31 кун ичида АҚШ билан ҳеч қандай музокаралар ўтказилмаганини маълум қилди. Шу билан бирга, у Вашингтон воситачилар, жумладан Покистон орқали «музокара ўтказиш сўрови» ва таклифлар юборганини тасдиқлади.

«Биз бу 31 кун ичида Америка билан ҳеч қандай музокара ўтказмадик, — деди Бағаий. — Гап воситачилар, жумладан Покистон орқали етказилган таклифлар тўплами билан бирга музокара сўрови ҳақида кетмоқда.»

Унинг сўзларига кўра, АҚШнинг ҳарбий ҳаракатлари давом этаётган бир пайтда Эрон барча куч ва имкониятларини мамлакат мудофаасига сафарбар қилган. Бағаий, шунингдек, Теҳрон ўтмишда дипломатик келишувлар «хиёнат» билан якунланган ҳолатларни унутмаганини таъкидлади — бу билан у ўтган йил июнь ойида АҚШнинг Эрон ядровий объектларига берган зарбаларини назарда тутди.