Германия иқтисодиётига 230 миллиард евро инвестиция жалб қилинади

Германия канцлери Фридрих Мерц мамлакат иқтисодиётига қарийб 230 миллиард евро миқдорида инвестиция жалб қилишга қаратилган келишувларга эришилганини маълум қилди.

Бу ҳақда у Берлинда икки кун давом этган Invest in Germany Summit инвестиция саммити якунлари бўйича билдириш берди.

"Мамлакатимизга билдирган ишончи учун инвесторларга миннатдорчилик билдираман", — дея Мерцнинг сўзларини келтиради Stern нашри.

Германия канцлери инвестиция киритувчи компанияларга мисол сифатида Amazon, NVIDIA, RWE, Blackstone, Microsoft ва Sanofi каби йирик корпорацияларни тилга олди.