Европада бошпана сўраб мурожаат қилаётганлар сони камайишда давом этмоқда. Яқин вақтларгача бошпана изловчилар учун асосий йўналишлардан бири бўлган Германия 2026 йилнинг биринчи ярми якунларига кўра, Европа давлатлари орасида тўртинчи ўринга тушди. Биринчи ўринни Франция эгаллаган, кейинги ўринларда Испания ва Италия қайд этилган.

2026 йилнинг биринчи ярмида Европа Иттифоқи давлатлари, шунингдек, Норвегия ва Швейцарияда жами қарийб 332 мингта бошпана сўрови берилган. Коронавирус пандемияси даври ҳисобга олинмаганда, бу 2019 йилдан буёнги энг паст кўрсаткичдир.

Умуман, Европа Иттифоқига келган бошпана изловчилар сони ўтган йилнинг шу даврига нисбатан 17 фоизга камайган.

Германияда ҳам бошпана сўраб берилган аризалар сони аввалги йилларга нисбатан сезиларли даражада қисқарган. Бунинг асосий сабабларидан бири сифатида мамлакатнинг миграция сиёсатини қатъийлаштиргани кўрсатилмоқда.

Германия ҳукумати чегараларда назоратни кучайтириб, мамлакатга киришни рад этиш имкониятларини кенгайтирган. Шу билан бирга, қочқинлар асосий келиб чиқадиган айрим давлатлардан Германияга етиб келаётганлар сони ҳам камайган.

Натижада Германияда бошпана сўровлари бўйича Европа Иттифоқидаги аввалги етакчилик мавқеи ўзгариб, мамлакат 2026 йилнинг биринчи ярми якунларига кўра Франция, Испания ва Италиядан кейин тўртинчи ўринни эгаллаган.