Камерун, Намибия ва Танзания мустамлака бўлган даврда мамлакатдан Европага олиб кетилган артефактлар қайтариб берилади, дейди Германиялик расмийлар.
Германия пойтахтидаги кўплаб музейларни бошқарадиган Берлинда жойлашган Пруссия маданий мерос жамғармаси душанба куни Намибия, Танзания ва Камерунга артефактларни қайтариш бўйича музокараларга киришганини маълум қилган.
Қайтарилиши керак бўлган артефактлар орасида она маъбуда Нгонсонинг ҳайкали ҳам бор, бу Камеруннинг шимоли-ғарбий Нсо халқи учун катта маънавий аҳамиятга эга ашё ҳисобланади.
Ҳайкал 1903 йилдан бери Берлин Этнология музейи коллекциясининг бир қисми бўлиб келган.
Кенгаш, шунингдек, 23 та артефакт, жумладан, заргарлик буюмлари ва асбобларни Намибияга доимий равишда қайтаришни маъқуллаган. 1884 йилдан 1919 йилгача бўлган мустамлака даврида ўғирланган тарихий буюмлар тадқиқот мақсадида ўтган ой Намибияга қайтарилган ва ўша ерда қолган.
Жамғарманинг таъкидлашича, унинг президенти ва бошқарув кенгашига кўпгина ваколатлар берилган. Жумладан, Мажи-Мажи қўзғолони, XX аср бошидаги мустамлакачилик даври ва бошқа можаролар пайтида Танзаниядан талон-тарож қилинган ашёларни қайтариш бўйича келишувни имзолаш ваколати берилган.
