Ғазода вайрон бўлган уй харобаларидан 28 нафар фаластинликнинг жасадлари топилди

Ғазо шаҳрида 2023 йил октябрида Исроил зарбаси натижасида вайрон бўлган Абу Нуме оиласи уйи харобалари остида 28 нафар фаластинликнинг жасад ва қолдиқлари топилди. Бу ҳақда Ғазо Фуқаро мудофааси бошқармаси маълум қилди.

Бир кун аввал ҳам Ғазонинг шимолида вайрон бўлган уйлар харобаларидан 101 нафар фаластинликнинг қолдиқлари аниқланган эди. Қидирув ишлари 17 кун давом этган.

Мақсадли қидирув ишларининг иккинчи босқичида 147 та вайрон бўлган бино харобаларини текшириш режалаштирилган. У ердан 1072 нафар инсоннинг қолдиқлари топилиши тахмин қилинмоқда.

Лойиҳа бошланганидан буён 54 та уй ва бино харобаларидан 333 нафарнинг жасад ва қолдиқлари чиқариб олинган.