Ғазода уруш янада кучаяпти! Исроил ҳудудларни эгаллаб олишини эълон қилди

Исроил Ғазога қуруқликдаги ҳужумини кенгайтирмоқда; очарчилик хавфи ортмоқда.

Исроил мудофаа вазири Исраэл Катс маълум қилишича, Исроил қуролли кучлари Ғазо секторидаги "буфер зоналар"ни кенгайтириш мақсадида "катта ҳудудларни эгаллаб олади".

Бу эълон Ғазонинг Исроил томонидан тинимсиз бомбардимон қилиниши натижасида тонг отгандан бери ҳалок бўлганлар сони камида 53 нафарга етгани ҳақидаги хабар билан бир вақтда келди. Ўтган ойда Исроил тинчлик сулҳини бузганидан бери 1100 дан ортиқ фаластинлик ҳаётдан кўз юмди.

Ғазодаги барча новвойхоналар - шу жумладан, Жаҳон озиқ-овқат дастури томонидан бошқариладиган 25 таси ҳам - Исроилнинг ҳудудга нисбатан қамали 31-кунга чўзилгани сабабли фаолиятини тўхтатди. Бу уруш бошланганидан буён энг узоқ давом этган қамалдур.

Ғазо Соғлиқни сақлаш вазирлиги маълумотларига кўра, Исроилнинг Ғазога қарши урушида камида 50 423 фаластинлик ҳалок бўлгани ва 114 638 нафари яралангани тасдиқланган. Ҳукумат матбуот хизмати эса вайроналар остида бедарак йўқолган минглаб одамлар ҳам ҳалок бўлган деб тахмин қилинаётганини айтиб, умумий қурбонлар сонини 61 700 дан ортиқ кишига етганини маълум қилди.