Франция Исроилга қарши "аниқ" қадамларни кўриб чиқмоқда

Франция президенти Эммануел Макрон пайшанба куни Франция қамалдаги Ғазога гуманитар ёрдам етказилишига тўсқинлик қилгани учун Исроилга қарши “аниқ қадамлар” кўриб чиқаётганини айтди.

Парижда Бразилия президенти Лула да Силва билан бирга сўзлаган Макрон яқин кунларда қарор қабул қилинишини айтди. " Бу масала бўйича мунозаралар давом этмоқда ", деди Франция президенти. " Яқин бир неча кун ичида биз ўз оҳангимизни кучайтиришимиз ва Исроилга нисбатан аниқ қадамлар қўйишимиз кераклигини ҳал қиламиз ".

Президент Лула Макронни қўллаб-қувватлаб, Фаластинни тан олишнинг маънавий ва сиёсий зарурлигини таъкидлади: "Фаластин давлатини тан олиш маънавий ва инсоний бурч, шунингдек, барча дунё раҳбарлари учун сиёсий талабдир".

" Бу ўз халқи манфаатларига қарши уруш олиб бораётган ўта ўнг ҳукумат томонидан қасддан қилинган геноциддир ", деди Бразилия президенти.

Франция ва Бразилия раҳбарларининг баёнотлари 17—20-июн кунлари Нью-Йоркда бўлиб ўтадиган Исроил-Фаластин можароси бўйича БМТ томонидан қўллаб-қувватланадиган конференсия олдидан янгради.Конференция Исроил хавфсизлигини таъминлаш билан бирга Фаластин давлатчилиги учун асос яратишга қаратилган.

Макрон аввалроқ Франция конференцияда Фаластин давлатини тан олиши мумкинлигини айтган ва Исроил ҳукумати уни “яҳудий давлатига қарши салиб юришида” айблаган эди.