"Flydubai"нинг иккинчи учувчиси 11 сентябр терактидан илҳомланиб, самолётни Исроил аэропортига урмоқчи бўлган

Flydubai самолётинининг иккинчивучувчиси 11 сентябр терактидан илҳомланиб, самолётни Исроил аэропортига урмоқчи бўлган — БАА Бош прокуратураси.

Ҳаммам ал-Ҳаммамий 2001 йил 11 сентябрдаги терактлардан илҳом олиб, самолётни Тел-Авивдаги Бен-Гурион аэропорти терминалига тўқнаштиришни режалаштирган. У шу йўл билан имкон қадар кўпроқ одамни ўлдирмоқчи бўлган. Бу ҳақда БАА бош прокурори Ҳамад Саиф аш-Шамсий маълум қилди.

БАА Бош прокурорнинг айтишича, Ўмон фуқароси Ҳаммам ал-Ҳаммамий 2017 йилда Австралияда ўқиб юрган пайтида экстремистик ғоялар таъсирига туша бошлаган. Бунга интернетдаги тарғибот материаллари таъсир кўрсатган.

Ҳаммам ал-Ҳаммамий 2020–2024 йилларда Oman Air авиакомпаниясида ишлаган. The Wall Street Journal маълумотига кўра, экстремистик қарашларда гумон қилингани сабабли унга парвоз қилиш тақиқланган.

Шу йилнинг январ ойида Ҳаммам ал-Ҳаммамий Flydubai авиакомпаниясига ишга кирган. Бош прокурорнинг сўзларига кўра, ишга қабул қилинишидан олдин у барча зарур текширувлардан ўтган. Текширувларда унинг экстремистик қарашлари аниқланмаган.

Ҳужумга тайёргарлик кўриш учун Ҳаммам ал-Ҳаммамий Тел-Авивга икки марта учиб бориб, Бен-Гурион аэропорти ва парвоз йўналишини ўрганган. Ҳозир тергов давом этмоқда. Терговчилар учувчининг шериклари бўлган-бўлмаганини ҳам аниқламоқда.

30 сентябр куни Ҳаммам ал-Ҳаммамий Дубайдан Тел-Авивга учаётган самолётнинг фавқулодда вазиятлар учун мўлжалланган болтаси билан ҳиндистонлик капитан Смит Мачхарга ҳужум қилган. Капитан оғир яраланган, самолёт эса кескин баландлик йўқота бошлаган. Самолёт 30 сониядан сал кўпроқ вақт ичида қарийб 5 километр пастлаб, ҳалокатга учрашига бир баҳя қолган.

Шунга қарамай, капитан учувчилар кабинаси эшигини очишга муваффақ бўлган. Йўловчилар ва экипаж аъзолари ҳужумчини қўлга олиб, унинг ҳаракатларини тўхтатган. Рейсда йўловчи сифатида кетаётган бошқа учувчилар бошқарувни ўз қўлига олиб, самолётни Саудия Арабистонининг Табук шаҳрига эсон-омон қўндирган.