Финляндия ЕИда россияликларга туристик визалар беришни тўлиқ тақиқлашни таклиф қилади

Финляндия бош вазири Петтери Орпо Европа Иттифоқи мамлакатларига Россия фуқароларига туристик визалар беришни тўлиқ тақиқлаш ташаббусини илгари сурмоқчи. Бу ҳақда Финляндиянинг Yle телерадиокомпанияси хабар берди.

Орпо мазкур таклифни 15–16 октябрь кунлари бўлиб ўтадиган Европа Иттифоқи саммитида муҳокамага киритишини маълум қилган.

«Келгуси ҳафта Европа кенгаши йиғилишида аниқ чорани таклиф қиламан — россияликларга Европага саёҳат қилиш учун туристик визалар беришни тўхтатиш», — деган Финляндия бош вазири.

Унинг таъкидлашича, Хельсинки Россия Европада диверсиялар уюштиришга уриниши мумкинлигидан хавотирда. Орпо шу муносабат билан россиялик сайёҳларнинг Европа бўйлаб эркин ҳаракатланиши масаласини кўтарган.

Маълумот учун, Финляндия 2022 йил сентябрь ойидаёқ Россия фуқароларига туристик визалар беришни тўхтатган ва россиялик сайёҳларнинг мамлакатга киришини чеклаган. Икки давлат ўртасидаги қуруқлик чегарасидаги ўтказиш пунктлари эса 2023 йил декабрь ойидан бери ёпиқ.