БМТнинг Озиқ-овқат ва қишлоқ хўжалиги ташкилоти (ФАО) Андижон, Наманган ва Фарғона вилоятларидаги деҳқон ва томорқа хўжаликларига 12 та мотокультиватор ва 12 та қўл пуркагич топширди. Қўрғонтепа туманидаги лойиҳа иштирокчиларига қўшимча равишда бир тонна карбамид минерал ўғити ҳам етказиб берилди.

Техник ёрдам ФАО ҳамда Ўзбекистон Республикаси Қишлоқ хўжалиги вазирлиги ҳамкорлигида амалга оширилаётган «Фарғона водийсида қишлоқ хўжалигини барқарор ривожлантириш учун Жануб–Жануб ва уч томонлама ҳамкорлик» лойиҳаси доирасида тақдим этилди.

Ускуналар Андижон вилоятининг Қўрғонтепа туманидаги «Навбаҳор», Наманган туманидаги «Бешкапа» ва Фарғона туманидаги «Саноат» маҳаллаларидаги лойиҳа иштирокчиларига берилди. Ҳар бир ҳудудга тўрттадан мотокультиватор ва қўл пуркагич ажратилди.

Янги ускуналар тупроққа ишлов беришни енгиллаштириш, қўл меҳнатини камайтириш ҳамда экинларни касаллик ва зараркунандалардан ҳимоя қилишга ёрдам бериши кутилмоқда.

Техник кўмак маҳаллий деҳқонларнинг билим ва кўникмаларини оширишга қаратилган ўқув машғулотлари билан ҳам тўлдирилмоқда. Сентябрь ва октябрь ойларида учта вилоятда ташкил этилган тренерлар тайёрлаш курсларини 38 нафар иштирокчи муваффақиятли якунлади. Машғулотларда тупроқ ва сув ресурсларини барқарор бошқариш, иқлимга чидамли экинларни етиштириш ҳамда замонавий қишлоқ хўжалиги усуллари ўргатилди.

Лойиҳа координатори Муҳаммаджон Қосимовнинг таъкидлашича, ўқув машғулотларини амалий техник ёрдам билан уйғунлаштириш орқали иқлим ўзгариши шароитида деҳқон ва томорқа хўжаликларининг ишлаб чиқариш салоҳиятини мустаҳкамлаш кўзда тутилган.

Лойиҳа Фарғона водийсида иқлим ўзгаришига мослашган қишлоқ хўжалигини ривожлантириш, ишлаб чиқариш самарадорлигини ошириш ва қишлоқ аҳолисининг турмуш шароитини яхшилашга қаратилган.