Замонавий даврнинг энг сирли миллиардери ким?

Британиялик миллиардер Питер де Пютроннинг яширин бизнеси ва унинг «Формула-1» билан боғлиқ фаолияти маълум бўлди

Қимматли қоғозлар савдоси орқали бойлик орттирган британиялик миллиардер Питер де Пютрон ўнлаб йиллар давомида жамоатчилик эътиборидан четда бўлишга ҳаракат қилган. Бироқ «Формула-1»нинг Williams жамоаси ва АҚШда маълумотлар маркази қурилиши билан боғлиқ суд низолари унинг бизнесига бўлган қизиқишни кучайтирди.

Financial Times (FT) газетаси хабар беришича, де Пютрон бойлигининг асосини Лондонда жойлашган G-Research компанияси ташкил этади. Ушбу компания молия бозорларида савдо қилиш учун компьютер дастурларини ишлаб чиқади.

Компания рақибларидан бирининг тахминига кўра, G-Research билан боғлиқ инвестиция фонди 10–12 миллиард долларлик активларни бошқаради. G-Research компаниясининг ўзи қимматли қоғозларни сотиб олиш ва сотиш билан шуғулланмайди. Унинг ходимлари фақат маълумотларни таҳлил қиладиган ва акциялар қийматининг ўзгаришини прогноз қиладиган дастурларни ишлаб чиқади. Кейин ушбу прогнозлар Буюк Британиядан ташқарида рўйхатдан ўтган ҳамкор компанияларга узатилади.

Маълумотларга кўра, бундай тизим де Пютронга бизнесининг катта қисмини солиқлар паст бўлган мамлакатларда юритиш имконини беради. Масалан, у билан боғлиқ компаниялардан бири Маршалл оролларида рўйхатдан ўтган. У ерда бизнес эгалари ҳақидаги маълумотларни ошкор қилишга нисбатан соддалаштирилган талаблар амал қилади.

Нашр ёзишича, де Пютрон 1997 йилда миллиардер Жорж Сорос кўмагида ўзининг биринчи инвестиция фондига асос солган. Кейинчалик у компьютер алгоритмларидан фойдаланган ҳолда савдо қилишга ихтисослашган. 2001 йилда молиячи Gloucester Research компаниясини ташкил этган. Кейинчалик компания G-Research деб номланган.

Шу билан бирга, миллиардер шахсий ҳаётига оид маълумотларни қатъий сир сақлайди. Financial Times суҳбатдошларининг айтишича, у учрашув жойини унинг бошланишига бир неча дақиқа қолганда маълум қилиши ва иштирокчилардан ўзлари билан электрон қурилмалар олиб келмасликни талаб қилиши мумкин. Ҳатто унинг айрим кўп йиллик танишлари ҳам телефон рақамини билмайди.

Интернетда унинг фотосуратлари мавжуд эмас. The Wall Street Journal нашри де Пютроннинг танишларидан бирининг фикрини келтирган. Унинг айтишича, миллиардер оммавий тадбирлардан бирида «одатий жосусга ўхшаб» кўринган: «шляпа, плащ ва бинода ҳам, кўчада ҳам тақиб юрадиган қуёшдан ҳимояловчи кўзойнаклар».

G-Research компаниясида ҳам қатъий қоидалар амал қилади. Ходимларга ички маълумотларни ошкор қилиш тақиқланган. Ишдан бўшаганидан кейин эса улар рақобатчи компанияларда ишлаш бўйича чекловларга дуч келиши мумкин. Маълумотларга кириш ҳуқуқи турли бўлинмалар ўртасида тақсимлангани сабабли ходимлар кўпинча бошқа бўлимлардаги ҳамкасблари нима билан шуғулланаётганини билмайди. Компания ахборотни ҳимоя қилиш учун махсус хавфсизлик тизимларидан фойдаланади.

Де Пютроннинг бизнеси молия бозорлари билан чекланиб қолмайди. У мудофаа саноати учун технологиялар ишлаб чиқувчи компанияларга, шунингдек, Williams «Формула-1» жамоасига эгалик қилувчи Dorilton Capital компаниясига ҳам сармоя киритган.

Бундан ташқари, Financial Times нашри унинг АҚШнинг Жанубий Каролина штатида йирик маълумотлар маркази ва электр станцияси қурилишини молиялаштираётган NorthMark компанияси билан алоқалари мавжудлигини кўрсатувчи белгиларни аниқлаган. Лойиҳанинг қиймати 2,8 миллиард долларга баҳоланмоқда. Электр станциясининг қуввати эса 460 МВтни ташкил этиши кутилмоқда.

Бироқ ҳар икки лойиҳа ҳам суд жараёнлари марказида қолган. Жанубий Каролинада маҳаллий аҳоли маълумотлар маркази ва электр станцияси қурилишига қарши чиққан. Улар лойиҳа ташаббускорини қурилиш кўламининг ҳақиқий ҳажмини яширишда айблаган.

Williams жамоаси билан боғлиқ низода эса жамоанинг маркетинг бўлими собиқ раҳбари Клаудия Шварц Dorilton компанияси ва шахсан де Пютрон устидан судга даъво киритган. Суд жараёни доирасида суд миллиардернинг кўрсатмаларини талаб қилишга рухсат берган. Бироқ суд вакиллари Жерси оролидаги манзил бўйича унга ҳужжатларни икки марта топшира олмаган.

Financial Times таъкидлашича, ушбу суд жараёнлари молиячини ўзи ва бизнеси ҳақида кўпроқ маълумот ошкор қилишга мажбур этиши мумкин.

Де Пютроннинг Буюк Британиядаги сиёсий ва жамоатчилик доиралари билан ҳам алоқалари бор. Оммавий ахборот воситалари маълумотларига кўра, унга қарашли компаниялар Буюк Британия Консерватив партиясига қарийб 1 миллион фунт стерлинг (1,3 миллион доллар) миқдорида хайрия маблағлари ажратган.

Унинг рафиқаси Хейли бошқарадиган хайрия жамғармаси эса Британия қироллик оиласи қўллаб-қувватлайдиган ташкилотларга миллионлаб фунт стерлинг маблағ йўналтирган. 2017 йилда ўша пайтда шаҳзода бўлган Чарльз унга кўрсатган ёрдами учун омма олдида миннатдорлик билдирган.

2016 йилда The Guardian нашри ҳам миллиардер билан боғлиқ компаниялар консерваторларга юз минглаб фунт стерлинг ўтказгани, шунингдек, Буюк Британиянинг Европа Иттифоқи билан муносабатларини қайта кўриб чиқиш тарафдори бўлган таҳлил марказларини молиялаштиргани ҳақида ёзган эди.

Маблағ олган ташкилотлардан бири Open Europe таҳлил маркази бўлган. Gloucester Research компанияси ушбу марказга қарийб 700 минг фунт стерлинг (933 минг доллар) хайрия қилган.

Де Пютроннинг яна бир қариндошлик алоқаси собиқ британиялик вазир Андреа Лидсом билан боғлиқ: миллиардер унинг синглисига уйланган. Нашр маълумотларига кўра, Лидсом ва унинг турмуш ўртоғи турли йилларда молиячига тегишли компанияларда раҳбарлик лавозимларида ишлаган.

Сиёсатчининг ўзи эса қариндоши томонидан ажратилган хайрия маблағлари унинг сиёсий фаолиятидаги муваффақиятига ёрдам берганини рад этган.