Фанлар академияси ҳақиқий аъзоси Галина Матвиевская вафот этди

Ўзбекистон Фанлар академияси ҳақиқий аъзоси Галина Павловна Матвиевская 95 ёшида вафот этди. Бу ҳақда Фанлар академияси матбуот хизмати хабар берди.

Ўзбекистон Фанлар академияси ҳақиқий аъзоси, физика-математика фанлари доктори, профессор Галина Павловна Матвиевская 95 ёшида вафот этди.

Г. П. Матвиевская 1930 йилда Днепропетровск (ҳозир Украинанинг Днепр шаҳри)да туғилган. 1954 йилда Ленинград (ҳозирги Санкт-Петербург) университетининг математика механика факультетини тамомлаган, 1959 йилда СССР Фанлар академияси (ҳозирги Табиатшунослик ва Россия техника Фанлар тарихи академияси)нинг институтида номзодлик диссертациясини ҳимоя қилган.

Ўша йили у Ўзбекистон Фанлар академияси В.И.Романовский номидаги Математика институтига ўрта асрлар Шарқидаги фанлар тарихи бўйича тадқиқотларни кучайтириш учун таклиф қилинди. 1968 йилда у докторлик диссертациясини ҳимоя қилди (илмий маслаҳатчиси - академик С. Х.Сирожиддинов). У Б.А.Розенфелд билан биргаликда жаҳон фондларида сақланаётган араб тилидаги математика ва астрономияга оид қўлёзмалар каталогини тузган, шогирдлари билан биргаликда Ўзбекистон Фанлар академияси Абу Райҳон Беруний номидаги Шарқшунослик институтидаги математик қўлёзмаларининг тавсифини амалга оширган.

Г.П.Матвиевская юртимиздан етишиб чиққан Муҳаммад ибн Мусо ал-Хоразмий, Абу Райҳон Беруний, Шамсиддин Самарқандий ва Мирзо Улуғбек, Самарқандда фаолият олиб борган Қозизода Румий, Жамшид Коший ва бошқа олимларининг илмий меросини ўрганиш ва тарғиб қилиш, шунингдек, илм-фан тарихи бўйича мутахассислар тайёрлашдаги хизматлари учун Беруний номидаги Ўзбекистон Давлат мукофоти (1974), «Ўзбекистон Республикасида хизмат кўрсатган фан арбоби» фахрий унвони (1980) билан тақдирланган.

У Ўзбекистон Республикаси Фанлар академияси мухбир аъзоси (1984), сўнгра Ўзбекистон Республикаси Фанлар академиясининг ҳақиқий аъзоси (2000) этиб сайланган эди.

Г. П.Матвиевская кўптилли олима эди - у лотин, инглиз, немис, француз ва араб тилларини билган, ЮНEСКО томонидан табиий фанлар тарихи бўйича йирик мутахассис сифатида тан олинган ва Халқаро фанлар тарихи академиясининг (Париж) ҳақиқий аъзоси этиб сайланган, У Хоразмий, Декарт, Беруний, Улуғбек, В.И.Романовский, Абдурраҳмон ас-Сўфий ҳақида китоблар нашр эттирган, шарқшунослик соҳасига илмий тўпламлар тузувчиси ва бош муҳаррири бўлган, Муҳаммад ибн Мусо ал-Хоразмийнинг 1200 йиллиги муносабати билан ташкил этилган юбилей (1983) тадбирларини ўтказишда фаол иштирок этган.