Европанинг катта учлиги Зеленский билан адолатли тинчликнинг бешта шартини келишиб олди

Хавфсизликнинг мустаҳкам кафолатлари ва музокараларни бошлаш: Европанинг катта учлиги Зеленский билан адолатли тинчликнинг бешта шартини келишиб олди.

​Украина ва унинг европалик яқин иттифоқчилари — Буюк Британия, Франция ва Германия раҳбарлари Россия билан урушни тугатиш бўйича "адолатли ва барқарор" битим тузиш учун бешта шартни келишиб олдилар.

​Зеленский билан Лондонда бўлиб ўтган музокаралардан сўнг эълон қилинган қўшма баёнотда Буюк Британия бош вазири Кир Стармер, Франция президенти Эммануэл Макрон ва Германия канцлери Фридрих Мерц Украинани "қатъий қўллаб-қувватлашларини" билдирдилар.

​Баёнотда айтилишича, Европа келажакдаги тартибга солиш жараёнида асосий ролни ўз зиммасига олади. Шу билан бирга, ушбу жараёнда АҚШ иштирок этиши зарурлиги таъкидланади.

​Лондондаги учрашувда Украина, Буюк Британия, Франция ва Германия раҳбарлари адолатли тинчлик учун қуйидаги бешта шартни келишиб олдилар:

​▪️ Ўт очишни зудлик билан тўхтатиш. Путин ҳарбий ҳаракатларни тўлиқ тўхтатишга рози бўлиши керак.

▪️ Ҳозирги тўқнашув чизиғи музокаралар учун бошланғич нуқта бўлиши лозим. Чегаралар куч ишлатиш йўли билан ўзгартирилиши мумкин эмас, Украинанинг иттифоқлар (жумладан, NATO) тузиш бўйича суверен ҳуқуқи тўлиқ ҳурмат қилиниши керак.

▪️ Хавфсизликнинг ишончли ҳуқуқий кафолатлари. Улар ўт очиш тўхтатилганидан кейин зудлик билан кучга кириши ва Украинада халқаро кучларни жойлаштиришни ўз ичига олиши керак.

▪️ Россия маблағлари токи Россия барча зарарларни қопламагунча музлатилган ҳолатда қолади.

▪️ Тинчлик битимида Европа хавфсизлик манфаатлари ҳисобга олиниши шарт. Европа Иттифоқи ва NATO'га тааллуқли ҳар қандай музокаралар мос равишда Европа Иттифоқи ва унга аъзо давлатлар, шунингдек, Шимолий Атлантика алянси иттифоқчиларининг розилигини талаб қилади.