Европа ва Украина Трамп Киев ва Москва ўртасидаги тинчлик музокараларидан чиқишга тайёрланаётганидан хавотирда

Европа ва Украина Трамп Киев ва Москва ўртасидаги тинчлик музокараларидан чиқишга тайёрланаётганидан хавотирда. Бу ҳақда Financial Times хабар берди.

Газетанинг ёзишича, АҚШ президенти Доналд Трамп Россия ва Украина ўртасидаги урушни якунлашга қаратилган тинчлик музокараларидан воз кечишга яқин турибди. Нашр бу ҳақда Европа ва Украина расмийларига таяниб хабар бермоқда.

Манбаларнинг айтишича, Трамп музокаралардаги “муҳим бўлмаган силжишлар”ни баҳона қилиб, “мени ишим тугади” деб айтиши мумкин. АҚШ вакиллари билан сўнгги учрашувлардан сўнг Европа ва Украина расмийлари Трамп бу ҳафта музокаралардаги ҳар қандай илгарилашдан фойдаланиб, уларни тарк этишга тайёрлигига ишонч ҳосил қилган.

"Трамп ўзига баҳона яратмоқда, шунда у музокараларни тарк этиб, ҳаммасини Украина ва Европага ташлаб қўйиши мумкин", — дея ҳисоблайди FT манбаларидан бири.

Газетанинг ёзишича, Украина расмийлари аллақачон ёлғиз ҳаракат қилишга тайёргарлик кўришни бошлаган: улар ички қурол-яроғ ишлаб чиқаришни оширган ва Европа иттифоқчилари билан келгусидаги ёрдам бўйича музокараларни кучайтирган.

Аввалроқ АҚШ давлат котиби Марко Рубио 28 апрел – 4 май оралиғидаги ҳафта Россия-Украина уруши бўйича музокаралар учун “жуда муҳим” бўлишини айтганди. Шу билан бирга, тинчлик келишувининг аниқ муддатини белгилаш “аҳмоқлик” бўлишини қўшимча қилганди. Апрел ойи бошида у яқин орада музокараларда силжиш бўлмаса, Вашингтон унда иштирок этишдан воз кечишга тайёрлигидан огоҳлантирган эди.

Президент Трамп эса томонлар музокара столига ўтириши учун “сўнгги муддат”ни белгилаганини айтган, бироқ бу муддат қачон тугашини очиқламаган.