Европа Иттифоқи (ЕИ) мамлакатлари ташқи ишлар вазирлари бугун Россиянинг ҳарбий-саноат мажмуаси билан боғлиқ 1 646 та жисмоний ва юридик шахсга нисбатан санкцияларни тасдиқлашни режалаштирмоқда. Бу Россиянинг Украинага қарши кенг кўламли уруши бошланганидан буён санкциялар рўйхатининг бир вақтнинг ўзида энг йирик кенгайтирилиши бўлади.
Чекловлар, асосан, ракеталар, учувчисиз учиш аппаратлари, двигателлар ва бошқа ҳарбий маҳсулотлар ишлаб чиқариш билан боғлиқ корхона ва тузилмаларга қаратилган.
Шунингдек, Украина ҳудудларида Россия Давлат думаси сайловларини ўтказишда иштирок этган 77 нафар россиялик сиёсатчига қарши ҳам алоҳида санкциялар жорий этиш режалаштирилмоқда.
Аввалроқ Европа Иттифоқи Қрим, Севастополь, шунингдек, Украинанинг Донецк, Луганск, Запорожье ва Херсон вилоятларининг Россия томонидан босиб олинган ҳудудларида ўтказилган сайловларни ҳамда уларнинг натижаларини тан олмаслигини билдирган эди.
Германия ташқи ишлар вазири Иоганн Вадефуль ушбу чораларни Россия ҳарбий иқтисодиётига қарши «мисли кўрилмаган санкцион зарба» деб атади.
«Шу орқали биз Путиннинг ноқонуний босқинчилик урушини давом эттиришини ва Украина тинч аҳолисини ҳалокатли террор орқали синдиришга қаратилган шафқатсиз уринишларини қийинлаштирамиз», — деди у.
Вадефулнинг таъкидлашича, Москва тинчлик бўйича жиддий музокараларга тайёр бўлмагунча, Россияга нисбатан босим кучайтириб борилади.
MrBeast: “Ўзбекистонда мухлисларим шу қадар кўпки, балки кетишимизга тўғри келар”
Нега айнан Эркинжон Турдимов? Бу қарор ортида қандай омиллар турибди?
Германия Россия билан дизель ёқилғиси етказиб бериш бўйича келишув тузишни таклиф қилди
