Европа иттифоқи 13 та янги лойиҳа орқали хомашё манбаларини кенгайтиради

Хитой экспортига боғлиқликни камайтиришни мақсад қилган Европа Иттифоқи 13 та янги металл ва минерал лойиҳаларини ишга туширмоқда. Уларнинг аксари қимматли хомашёларга йўналтирилган.

Европа Иттифоқи 4 июн куни стратегик аҳамиятга эга хомашёларни ўзлаштиришга қаратилган 13 та янги лойиҳа ҳақида эълон қилди. Reuters хабарига кўра, бу металл ва минераллар мудофаа, аэрокосмик ҳамда қайта тикланадиган энергия соҳаларида рақобатбардошликни таъминлаш учун муҳим аҳамиятга эга.

Бу қадам Хитойнинг апрел ойида ноёб ер металлари экспортига чеклов жорий этганидан сўнг ташаббус сифатида қабул қилинди. Европа Комиссияси вакиллари, жумладан, комиссар Стефан Сежурннинг таъкидлашича, ЕИ Хитойга бўлган хомашё қарамлигини камайтиришга интилади. Унинг сўзларига кўра, экспортдаги чекловлар ЕИнинг диверсификацияга бўлган ҳаракатини янада жадаллаштирмоқда.

Европа Иттифоқи 2023 йилда қабул қилган “Муҳим хомашёлар тўғрисида”ги қонунга мувофиқ, 2030 йилга қадар ички эҳтиёжларнинг 10 фоизини ўз ҳудудида қазиб олиш, 40 фоизини қайта ишлаш ва 25 фоизини қайта тиклаш белгиланган.

Янги лойиҳаларнинг 10 таси электромобиллар ва энергия сақлаш тизимлари учун муҳим бўлган литий, кобальт, марганец ва графит сингари материалларга қаратилган. Бу ресурслар экологик тоза технологиялар учун асос бўлиб хизмат қилади.

Лойиҳалар дунё бўйлаб тарқалган: Жанубий Африка ва Малавида икки, қолганлари Буюк Британия, Канада, Гренландия, Қозоғистон, Мадагаскар, Норвегия, Сербия, Украина, Замбия, Бразилия ва Франциянинг Янгикаледония ҳудудларида амалга оширилади.

Айниқса, Британияда волфрам, Украина ва Гренландияда эса графит қазиб олиш режалаштирилган. Мудофаа саноати учун муҳим бўлган волфрам лойиҳаси GreenRoc Strategic Materials 2 компанияси томонидан бошқарилади.