Европа етакчилари Трампнинг хатти-ҳаракатларини муҳокама қилиш учун ёпиқ чат гуруҳи ташкил қилган

Politico: Европа етакчилари Трампнинг хатти-ҳаракатларини муҳокама қилиш учун ёпиқ чат гуруҳи ташкил қилган.

Европа етакчилари ўтган йилдан бери АҚШ президенти Доналд Трампнинг қарорлари ва кескин баёнотларини ёпиқ гуруҳ чатида муҳокама қилиб келмоқда, дея ёзади нашр.

Politico маълумотларига кўра, ёзишмаларда Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Европа Комиссияси раиси Урсула фон дер Ляйен, Финляндия президенти Александр Стубб ҳамда Италия бош вазири Жоржа Мелони мунтазам иштирок этади.

“Вашингтон гуруҳи” деб номланган ушбу чат Европа кескин ёки потенциал беқарорлаштирувчи деб баҳолаётган Трампнинг ҳаракатлари юзасидан тезкор ахборот алмашиш ва позицияларни мувофиқлаштириш учун ишлатилади. Politico манбалари бундай формат воқеалар тез ривожланадиган вазиятларда анъанавий дипломатик каналларга нисбатан самаралироқ эканини билдирган.

Чат ўтган йил август ойида Европа етакчилари Украина президенти Владимир Зеленский билан биргаликда Оқ уйга ташриф буюрганидан сўнг ташкил этилган. Хабарда қайд қилинишича, Зеленский ҳам ёзишмаларда қатнашади.

Европа етакчилари дастлаб АҚШнинг фақат реал ҳаракатларига жавоб бериб, вазмин позицияни сақлаб келган. Бироқ Гренландия билан боғлиқ вазият ва Трампнинг бож жорий этиш ҳақидаги таҳдидлари ортидан Вашингтон билан муносабатларда янада қатъий ва мустақил ёндашув тарафдорлари кўпайган.

Politico'нинг ёзишича, етакчилар ўртасидаги норасмий мулоқот эндиликда нафақат тезкор реакциялар, балки хавфсизлик ва ташқи сиёсат соҳасида кенгроқ мувофиқлаштириш учун ҳам муҳим платформага айланмоқда.

Нашр суҳбатдошларининг айтишича, АҚШнинг Европа хавфсизлигининг асосий кафолатчиси сифатидаги роли янада заифлашса, ушбу формат муҳим аҳамият касб этиши мумкин.