Эронда норозилик намойишлари чоғида ҳалок бўлганлар сони 500 кишидан ошди

Декабр ойининг охиридан бери Эронда давом этаётган тартибсизликлар вақтида камида 490 нафар намойишчи ва камида 48 нафар куч тузилмалари ходими ҳалок бўлган, шунингдек, 10 600 дан ортиқ намойишчи ҳибсга олинган. Бу ҳақда HRANA ҳуқуқни ҳимоя қилиш ташкилоти хабар бермоқда.

Намойишчилар миллий валюта курсидаги тебранишларни жиловлаш учун ҳукуматнинг “зудлик билан аралашуви” ҳақидаги иқтисодий талаблар билан бирга, сиёсий талабларни ҳам илгари сурмоқда. Шунингдек, улар Оятуллоҳ Али Хоманаийнинг суратларини ёқишмоқда. Акция иштирокчилари “Диктаторга ўлим”, “Озодлик” ва “На Ливан, на Ғазо, жоним Эрон учун фидо” каби сиёсий шиорларни айтишмоқда.

Митинглар ҳуқуқ-тартибот органлари билан тўқнашувларга айланиб кетди. Хавфсизлик кучлари намойишчиларга кўздан ёш оқизувчи газ қўлламоқда. Бундан ташқари, намойишчиларга қарши ўқотар қуроллар қўлланилаётгани хабар қилинмоқда.