Эрон: МАГАТЭ билан ҳамкорликни тўхтатувчи қонун ҳукумат учун мажбурийдир

Эрон Ташқи ишлар вазирлиги матбуот котиби Эсмоил Бағаи Эроннинг Атом энергияси бўйича халқаро агентлик (МАГАТЭ) билан ҳамкорлиги Исроил ва АҚШнинг ҳужумларидан кейин аввалгидек давом эта олмаслигини айтди, деб хабар беради Anadolu.

Унинг таъкидлашича, парламентнинг агентлик билан ҳамкорликни тўхтатиш тўғрисидаги қарори амалга оширилиши керак.

Теҳрондаги матбуот анжуманида Бағаи 31 май куни эълон қилинган Эрон ядровий дастури бўйича МАГАТЭ ҳисоботи АҚШ ва Исроилнинг янги душманлик ҳаракатларига баҳона бўлганини айтди.

“Бу хабар шунчаки баҳона эди. Шунинг учун агентлик тушунтириш бериши керак. МАГАТЭ бош директори Мариано Гросси, айниқса, бир неча кун олдин тинч ядровий иншоотларимизга қилинган ҳужумлардан кейин ҳам баъзи талабларни қўйишда давом этаётгани тушунарсиз”, – деди Бағаи.

Унинг айтишича, Эрон ҳозирги шароитда агентлик инспекторлари хавфсизлигини кафолатлай олмайди.

“Агентлик ва унинг раҳбари бу ҳужумларни оқлаб, қонунийлаштираётган бир пайтда, Ядро қуролини тарқатмаслик тўғрисидаги шартномага аъзо давлат ноқонуний зарбалар берилган тақдирда ўз мажбуриятларини бажаришини кутишнинг иложи йўқ”, – деди у.

Бағаи парламент томонидан қабул қилинган, МАГАТЭ билан ҳамкорликни тўхтатиб туришни назарда тутувчи қонун ҳукумат учун мажбурий эканлигини ва агентлик ўз позициясини қайта кўриб чиқиши кераклигини таъкидлади.

Ядро дастури бўйича АҚШ билан музокараларни қайта бошлаш истиқболлари ҳақидаги саволга жавоб берар экан, дипломат ҳозирча аниқ қарор қабул қилинмаганини, бироқ маслаҳатлашувлар давом этаётганини айтди.

Исроилнинг Эронга қарши тажовузи юзасидан Европа давлатларининг позициясини изоҳлар экан, Бағай Германия ва Франция вакилларининг баёнотларини ўринсиз деб атади.