Эрон ҳужумлари Яқин Шарққа қандай зарар етказди?

Эрон дрон ва ракета ҳужумлари натижасида Яқин Шарқдаги камида 17 та америкалик ҳарбий, дипломатик ва ҳаво ҳужумидан мудофаа объектлари зарар кўрди. Бу ҳужумлар Исроил ва АҚШ томонидан Эронга қарши бошланган қўшма амалиётлар бошланганидан бери амалга оширилган.

Бу ҳақда The New York Times ўз маълумотларига таяниб хабар берди.

Маълумотларга кўра:

• зарар кўрган объектларнинг камида 11 таси ҳарбий базалар ёки ҳарбий иншоотлар;

• бу эса минтақадаги АҚШ ҳарбий объектларининг қарийб ярмини ташкил қилади.

Энг катта зарарлар

Ҳаво ҳужумидан мудофаа тизимлари энг қиммат йўқотишлардан бири бўлган. Спутник суратлари Қатар даги Умм Дахал ҳудудида жойлашган эрта огоҳлантирувчи радиолокация станцияси шикастланганини кўрсатган. Унинг қиймати 1,1 миллиард доллар бўлиб, 4800 км радиусни қамраб олишга мўлжалланган.

Шунингдек, таҳлилларга кўра Эрон THAAD (Terminal High Altitude Area Defense) ракетага қарши мудофаа тизимининг айрим қисмларини ҳам нишонга олган.

Баҳрайндаги зарба

Баҳрайн да жойлашган АҚШ денгиз кучларининг Бешинчи флоти штабига 28 феврал куни берилган зарба тахминан 200 миллион долларлик зарар етказган. Бу ҳақда Пентагон баҳолашларига таяниб Конгресс вакили газетага маълум қилган.

Дипломатик объектлар ҳам нишон бўлган

Эрон ҳужумлари натижасида АҚШ дипломатик муассасалари ҳам хавф остида қолган. Шу сабабли:

• Дубай даги консуллик вақтинча ёпилган;

• Кувайт ва Эр‑Риёд даги элчихоналар ҳам вақтинча ёпилган.

Бу ҳужумларда жабрланганлар бўлмаган.

АҚШ расмийларининг баҳоси

Америкалик амалдорлар таъкидлашича, ҳужумлар шуни кўрсатдики, Эрон урушга кўпчилик кутгандан кўра яхшироқ тайёрланган. Айримлар фикрича, бу ҳолат Дональд Трамп маъмуриятида ҳам кутилмаган даражада бўлган.