Эрон ҳарбий сунъий йўлдошини орбитага олиб чиқди

Эроннинг икки босқичли Simorgh ракетаси 6 декабрь куни эрталаб мамлакат Мудофаа вазирлиги эҳтиёжлари учун қурилган Fakhr-1 сунъий йўлдошини орбитага олиб чиқди.

Бу ҳақда Tasnim агентлиги хабар бермоқда.

Сунъий йўлдош Имом Хомайний космодромидан муваффақиятли учирилди. Fakhr-1 орбитага Saman-1 юқори босқичи билан бирга чиқарилди, унинг вазифаси сунъий йўлдошларни юқори орбитага ўтказишдан иборат.

Қайд этилишича, ҳарбий сунъий йўлдошнинг аксар компонентлари Эрон компаниялари томонидан лойиҳалаштирилган ва ишлаб чиқарилган.

Шунингдек, учириш Эрон космик саноати учун фойдали юк бўйича янги рекорд ўрнатди, бу сафар у 300 кг га етди.

Эрон космик дастурини 2004 йилда бошлаган. 1959 йилда тузилган БМТнинг Космосдан тинч мақсадларда фойдаланиш қўмитасининг 24 та асосчи давлатларидан бири.