Эрон билан урушнинг бир ҳафтаси АҚШга қанчага тушгани маълум бўлди

АҚШ ва Исроилнинг Эронга қарши қўшма ҳарбий операциясининг биринчи ҳафтаси Америка бюджетига тахминан 6 миллиард долларга тушди.

The New York Times газетасининг ёзишича, Пентагон вакиллари шу ҳафта Конгрессга ҳарбий ҳаракатларнинг дастлабки етти кунидаги харажатлар бўйича ҳисобот берган. Умумий сумманинг қарийб 4 миллиард доллари ўқ-дориларга, биринчи навбатда, Теҳроннинг жавоб ҳужумларини қайтариш учун ишлатилган қимматбаҳо ракета-тутқичларга сарфланган.

"Теҳрондаги мажмуага берилган зарба урушнинг биринчи ҳафтасидаги чигал ҳақиқатни акс эттиради: АҚШ ва Исроилнинг заифлашган рақибга қарши вайронкор ҳаво кампанияси, аммо шу билан бирга, ғалаба қандай кўринишда бўлиши ҳақидаги саволга деярли жавоб йўқ", — деб қайд этади нашр.

Журналистларнинг кўрсатишича, низо бошланганидан бери иттифоқчи кучлар Эрон ҳудудидаги нишонларга, жумладан, баллистик ракеталар позицияларига, ҳарбий штаблар ва ҳарбий-денгиз кучлари объектларига 4 мингга яқин зарба берган.

Бомбардимонлар кўламига қарамай, Эрон ўз салоҳиятининг сезиларли қисмини сақлаб қолмоқда. Америка расмийларининг ёпиқ брифингларда берган баҳоларига кўра, Теҳронда ракета арсеналининг тахминан ярми ва катта миқдордаги учувчисиз учиш аппаратлари қолган.