Эрон АҚШ учун қурол-яроғ олиб кетаётган кемаларга ҳужум қилди

Эрон Ҳормуз бўғозида зарба берган кемалар нефть ва газ эмас, балки Қўшма Штатлар учун қурол ва ўқ-дорилар ташиётган эди.

Эрон Ташқи ишлар вазирлиги вакили Исмоил Бағайи бу ҳақда IRIB нашрига берган интервьюсида маълум қилди.

"Америка ҳарбий кемалари нефть ёки суюлтирилган табиий газ ташийдиган йирик кемаларга яқинлашаётгани кузатилди", деди у.

Бағайининг сўзларига кўра, Америка ҳарбийлари Эрон Қуролли Кучларининг назорат зонасидан ташқарида қолиш учун кузатув тизимларини ўчириб қўйишган ва ҳарбий хизматчилар, жиҳозлар ва жанговар транспорт воситаларини ташиш учун савдо кемаларидан фойдаланишган.

Унинг таъкидлашича, АҚШнинг бундай ҳаракатлари Исломобод меморандумининг 5-бандини бузган:

"АҚШ Марказий қўмондонлиги (CENTCOM) ҳарбий кемаси жанубий ва рухсатсиз йўналиш бўйлаб суюлтирилган газ ташийдиган катта кема орқасига яшириниб ўтди. Бу нафақат хавфли ўтиш жойи, балки АҚШнинг сулҳ келишувини суиистеъмол қилиш ва Эронга қарши душманона ҳаракатлар учун шароит яратиш ниятининг аниқ белгиси ҳам эди."

Эрон Ташқи ишлар вазирлиги вакили Теҳрон бунга норозилик билдирганидан сўнг, АҚШ ҳужумларини кучайтирганини таъкидлади.

"Бошқача айтганда, улар келишув бўйича ўз зиммаларига олган барча мажбуриятларидан амалда воз кечишди", деди Бағайи.