Эрдўған Путинга мораторий эълон қилишни таклиф қилди

Эрдўған Путинга Украина урушида портлар ва энергетика объектларига ҳужумларни вақтинча тўхтатиш бўйича мораторий эълон қилишни таклиф қилди.

Бу ҳақда Anadolu агентлиги Туркия президенти матбуот хизмати баёнотига таяниб хабар берди.

"Президент Эрдўған Украина–Россия урушини адолатли ва мустаҳкам тинчлик орқали якунлашга қаратилган саъй-ҳаракатлар жуда муҳимлигини таъкидлади. У аввало энергетика объектлари ва портларга нисбатан ўт очишни тўхтатиш режимини жорий этиш фойдали бўлишлигини айтди", дейилади хабарда.

Россия президенти матбуот котиби Дмитрий Песков журналистларга Путиннинг Эрдўған билан Ашхободдаги учрашуви ҳақида гапирар экан, суҳбатнинг Украина урушига оид қисмини изоҳламай, томонлар бу масалада фақат “фикр алмашганини” айтди.

Украина президенти Владимир Зеленский эса пайшанба куни Киевда журналистларга Туркия портлар, кемалар ва энергетика объектлари бўйича ўт очишни тўхтатиш таклифи устида ишлаётгани ҳақида маълум қилган эди.

"Президент Эрдўған менга бу ҳақида гапирди. Мен унга биз буни қўллаб-қувватлашимизни айтдим. У аввал қўмондонлар даражасида, кейин етакчилар даражасида учрашув ташкил этмоқчи эканини билдирди", — деди Зеленский.