Роналду терма жамоадаги фаолиятини якунлаётгани ҳақида Жезушга хабар бермаган: футболчининг қарори мураббийни кутилмаганда ҳайратда қолдирди

Ҳужумчи Криштиану Роналду Португалия терма жамоасидаги фаолиятини якунлаётганини миллий жамоа бош мураббийи Жорже Жезушни хабардор қилмасдан эълон қилган.

A Bola нашри хабар беришича, футболчи қабул қилган қарори ҳақида Португалия футбол федерацияси президенти Педру Проэнсага маълум қилган, бироқ 30 сентябрдан бери мулоқот қилмаётган Жезушни бу ҳақда огоҳлантирмаган.

Маълум қилинишича, Криштиану Жезуш қўл остида бошқа ўйнашни истамаган ва Миллатлар лигаси ўйинлари учун терма жамоа таркиби эълон қилинишидан олдин ўз қарорини билдирган. Бу орқали у жамоага чақирилмасликни мақсад қилган. Айни пайтда Жезуш Роналдуни терма жамоага чақиришни режалаштирган эди. Шу сабабли ҳужумчининг қарори мураббий учун кутилмаган ҳол бўлган.

Шу билан бирга, Actu Foot нашрининг ёзишича, Жезуш миллий жамоа машғулотлар залида Роналдунинг суратини ёш футболчилар учун намуна сифатида жойлаштирганини айтган.

«Криштиану — Португалия ва терма жамоа учун ўзига хос намуна. Барча ёш футболчилар ҳар куни кўз олдида шу намуна бўлишини истаб, унинг катта суратини машғулотлар залимизга осиб қўйдим. Мен ундан мен билан фаолиятини давом эттиришни сўрадим, чунки бу мен учун муҳим эди. Аммо унинг қарорини қабул қилишим керак. У португалияликлар қалбида абадий қолади», — дея мутахассиснинг сўзларини келтиради нашр.

41 ёшли Криштиану Роналду Португалия терма жамоасидаги дебютини 2003 йил 20 август куни, 18 ёшида Қозоғистон терма жамоасига қарши ўртоқлик учрашувида (1:0) ўтказган. У ўйиннинг иккинчи бўлимида захирадан майдонга тушган.

Ҳужумчи Португалия терма жамоаси сафида жами 234 та ўйинда майдонга тушиб, 146 та гол ва 45 та голли узатмани амалга оширган. Роналду 2016 йилда Европа чемпиони, шунингдек, УЕФА Миллатлар лигасининг икки карра ғолиби (2018/2019 ва 2024/2025 йиллар мавсумлари) бўлган.