Буюк Британия ва Франция тинчлик келишуви тузилса, Украинага қўшин юборишга тайёр — BBC

Буюк Британия ва Франция Россия билан тинчлик келишуви тузилган тақдирда Украина ҳудудига ҳарбий кучлар жойлаштириш ниятида эканини маълум қилди. Бу ҳақда Буюк Британия Бош вазири Кир Стармер Парижда Украина иттифоқчилари билан бўлиб ўтган музокаралардан сўнг билдирди.

Унинг айтишича, томонлар Украинада келгусида эҳтимолий ҳужумларни олдини олиш мақсадида ҳарбий инфратузилма марказларини ташкил этишни режалаштирмоқда. Франция Президенти Эммануэль Макрон эса минглаб ҳарбий хизматчилар жойлаштирилиши мумкинлигини билдирди.

Учрашув иштирокчилари Украина учун кучли хавфсизлик кафолатлари масаласида умумий келишувга яқинлашган. Шунингдек, эҳтимолий сулҳни назорат қилишда АҚШ етакчи роль ўйнаши таклиф қилинмоқда. Бироқ ҳудудлар масаласи ҳали ҳам музокара қилинаётган энг мураккаб жиҳат бўлиб қолмоқда.

Россия томони эса Украинада ҳар қандай хорижий қўшинларни «қонуний нишон» деб ҳисоблашини бир неча бор таъкидлаган. Москва ҳозирча Париждаги баёнотларга расмий муносабат билдирмади.

Украина Президенти Владимир Зеленский музокараларни «катта қадам» деб баҳолаб, улар фақат урушга барҳам беришга олиб келган тақдирдагина етарли бўлишини таъкидлади. Унинг сўзларига кўра, тинчлик келишуви деярли 90 фоизга тайёр, қолган масалалар эса Украина ва Европа тақдирини ҳал қилади.