Буюк Британия санкциялар рўйхатини янгилаб, унга Россиянинг “Роснефть” ва “Лукойл” компанияларини ҳам қўшди

"Иккала компания ҳам стратегик ва иқтисодий аҳамиятга эга бўлган соҳада бизнес юритиш орқали Россия ҳукуматини қўллаб-қувватламоқда", дейилади санкциялар рўйхати изоҳида.

Буюк Британия “Роснефть” раҳбари Игорь Сечинга нисбатан шахсий санкцияларни 2022 йил март ойида, “Лукойл” раҳбари Вагит Алекперовга нисбатан эса 2022 йил апрель ойидан бошлаб жорий қилганди, деб эслатди “Медуза”.

15 октябр куни янгиланган рўйхатга Ҳиндистоннинг Nayara Energy компанияси ҳам киритилган бўлиб, унинг эгаси “Роснефть” ҳисобланади.

Санкциялар, хусусан, қора рўйхатга киритилган жисмоний ва юридик шахсларнинг барча активлари Буюк Британия ҳудудида музлатиб қўйилишини англатади.

Россия қўшинларининг Украинага кенг кўламли бостириб кириши бошланганидан кўп ўтмай, “Роснефть” ва “Лукойл” Европа Иттифоқи санкциялари остида қолганди. АҚШ Россиянинг Украинага бостириб кириши туфайли ушбу компанияларга нисбатан санкциялар киритмаган, бироқ уларнинг шуъба корхоналари, шунингдек, улар билан боғлиқ жисмоний шахсларни қора рўйхатга қўшган.