Буюк Британия Россияга қарши янги санкцияларни маъқуллади

Буюк Британия Россияга қарши янги санкцияларни маъқуллади. Бу ҳақда BBC хабар берди.

Қироллик ҳукумати ушбу санкциялар бўйича батафсил баёнот эълон қилди ҳамда янгиланган санкциялар рўйхатини тақдим этди.

"Сўнгги санкциялар қамровига Россиянинг “ҳарбий машинаси”ни, энергия ресурслари экспортини ва ахборот урушини қўллаб-қувватловчи тузилмалар, шунингдек, Путиннинг босқинини молиялаштиришга ёрдам бераётган молиявий муассасалар киради", дейилади Британия ҳукумати баёнотида.

Хусусан, Лондон яна 14 нафар шахсга қарши санкциялар жорий этди. Улар “Ижтимоий лойиҳалаш агентлиги” аъзолари сифатида тилга олинмоқда — бу ташкилот Ғарб давлатлари томонидан Украинада ва бошқа демократик мамлакатларда “Россиянинг сиёсий аралашуви учун асосий воситалардан бири” деб ҳисобланади.

Молиявий муассасалар орасида 46 та компания, шунингдек, Санкт-Петербург валюта биржаси ва “Омонатчиларни суғурталаш агентлиги” давлат корпорацияси Британия санкцияларига учради.

Бундан ташқари Лондон санкциялари Россия “соя флоти”га қарши 18 та кемани, шунингдек, Россия нефтини ташиш учун кема сотиб олган британиялик Жон Майкл Ормеродни ва бундай танкерлар капитани бўлган икки россияликни ҳам қамраб олади.