Буюк Британия Россияга қарши 100 та янги санкциялар жорий қилди

Буюк Британия ҳукумати Россияга нисбатан 100 та янги санкциялар жорий этганини эълон қилди. Бу чекловлар Москвага нефтьдан тушадиган даромадлар ва ҳарбий соҳадаги муҳим компонентлар етказиб беришга қаратилган.

Санкциялар Россия нефтини ташувчи "соя флоти" ва ҳарбий техника етказиб берувчиларга нисбатан қўлланилди.

Британия ҳукумати баёнотида шундай дейилган:
"Ушбу чоралар Россияга нисбатан иқтисодий босимни кучайтиради — улар мамлакатнинг ҳарбий соҳасига ва ноқонуний соя флотига қаратилган. (Россия президенти Владимир) Путин урушни янада кучайтиришда давом этмоқда, украиналикларни ракеталар ва дронлар орқали қўрқитмоқда."

Янги санкциялар доирасида Россия нефтини ташишда иштирок этаётган 70 та кема, шунингдек Россиянинг ҳарбий машинасини қўллаб-қувватлаётган 30 та компания ва жисмоний шахсга қарши чекловлар жорий қилинди.

Лондон маълумотларига кўра, улар етказиб бераётган электроника Россия қуролларида, жумладан "Искандер", Х-101 ракеталари ва дронларда кенг қўлланилади.

12 сентябрь куни Буюк Британиянинг ташқи ишлар вазири Иветта Купер ўзининг биринчи ташқи ташрифи доирасида Киевга келди. Унинг ташрифи куни Лондон Украинага қиш мавсумида ёрдам сифатида 142 миллион фунт стерлинг (160 миллион евродан ортиқ) ажратилишини эълон қилди.

Аввалроқ хабар берилишича, Купер ташқи ишлар вазири лавозимини эгаллаганидан сўнг илк телефон суҳбати Украина ташқи ишлар вазири Андрей Сибига билан бўлиб ўтган.